Namdapha National Park & Tiger Reserve, Arunachal Pradesh-a mihring chenna hnaih taka sakei hmuh chhui zuinaah thing tawlh thinten an lo chhekna thin hmuh chhuah nawlh a ni.
District thuneitu sang pakhat chuan sakei hmuhna an dap zuinaah ram ngaw pilril takah dan lova thing chhehna hmun an hai chhuak tih hi a sawi a ni.
Royal Bengal Tiger hi January thla khan thlalaknain Deban Forest Inspection Bungalow bul lawkah a thla a la fuh a ni.
Tun hi kum riat zet hnua Namdapha-a sakei hmuh leh hmasak berna a ni.
Sakei hmuh a nih hnuah hian district thuneitu leh forest department thawktute chuan ram pilril atanga kum 2015 hnua a lo chhuah mai dan an en zuinaah national park chhunga thing tawlh tur chhekna lian tak an hmu ta a ni.
Namdapha National Park hi Changlang district, Myanmar nena inrina hrula awm niin sq km 1,985-a zau niin a pilril hi sq km 1,808 niin a pawn lang hi sq km 177 a ni.
March 14 khan Changlang Deputy Commissioner Sunny K Singh kaihhruai team chuan a pilril laiah hian phal lohva thing kih dah khawm thahnem tak an hmu chhuak a ni.
Thing tawlh rutute hian ram pilril chhung leh a chhehvelah km 20-a thui kawng an lo sial bawk niin Singh chuan a sawi.
Truck te chi chauhvin a zawh theih kawngpui hi km 1-2 vel chu park pilril huama kal niin a bak zawng hi a pawnlanga awm a ni thung.
DC chuan Changlang-ah hian thing behchhan industry-te chu forest department-in thing kih phalsak chin permit an pe a, veneer leh plywood siamin district pawnah an thawn chhuak thin niin a sawi.
“Thing kittute hian permit peka phal chin bak an kit a ni. Park chhungah kawng an sial bawk a, November vel atanga an tan a nih hmel,” a ti.
District thuneitu hian engtin nge thing tawlhtute hian forest department-in an ven karah hetianga tam thama thing an kiha an dah khawl theih tih chu hriat mai theih a la ni lo tih a sawi.
Forest thuneitute chu khauh zawka duty tur leh Namdapha leh a chhehvelah a titute mana an laka na taka hremna lek turin a ti nghal.
Beihpui an thlaknaah hian mi pariat an man a. Excavator, pickup leh truck pahnih man bawkin pakhat hian thing a phur a. Ramhnuaiah excavator leh truck pahnih kalsan an hmu bawk tih Singh chuan a sawi a. Arunachal leh Assam mi pakhat ve ve an tlanchhe hman a, man theihna thupek chhuah nghal a ni tih DC chuan a sawi.
Thing chhek kawl sa an hmuh zawng zawng hi 2,000 CFT (cubic feet) lai ni tura ngaih a ni.
Namdapha National Park-ah hian thing leh pangpar chi hrang hrang a tam hle a. Zawhte lian chi chi li – sakei, leopard, snow leopard leh clouded leopard hmuh tur an awmna hmun a ni bawk.