Somali sorkar leh UN-in report an siam tharah fur laia ruah a sur loh fo avangin nikuma khawkheng avanga Somalia rama thi chu mi 43,000 vel zet an nih theih thu an tar lang.
Report tihchhuah tak hi sorkarin Horn of Africa an tih maia khawkheng avanga thi zat a puan hmasakna ber a ni a. Thi zinga a zahve aia tam hi naupang kum nga hnuai lam a nih rin a ni.
Chhiatna thleng hi ‘a la tawp mai dawn lo’ tia tar langin, kumin kum chanve chhung hian mi 18,000-34,000 vel an la thih theih thu an tar lang tel.
Kum 2011 khan Somalia-ah hian tam nasa taka tlain mi cheng hmun lia thena hmun khat chuang zet an lo thi tawh.
World Health Organisation (WHO) representative Dr Mamunur Rahman Malik chuan, “Thihna thleng tur tihtlem leh nunna chhan tumin theihtawp kan chhuah mek a ni,” a ti.
Chet thuai thuai loh chuan naupang, hmeichhia leh derthawng deuhte chu ‘beiseina nei lo leh puitu nei lovin an thi’ dawn a, chhiatna chu a thuahin a thleng dawn niin a sawi.
UN hian kuminah Somalia-a khawkheng tuarte tan hian puihna $ tluklehdingawn 2.6 mamawh a nih tur thu an sawi a. Heng zinga 15% pawh la tling lo chauh sum an la hmu.
Ranvulh maktaduai tel an thi tel a, hei hi sik leh sa inthlak nasa, politics mumal lo leh khawvel puma ei tur man sang nghawng a ni.
Harsatna lian tak pakhat chu US leh UK-in firfiak pawla a puan, al-Qaeda nena inzawm, al-Shabab helhovin an thunun lai hmuna puihna thawn luh theih loh chu a ni.
al-Shabab hian Somalia-ah hian beihna rapthlak tak tak thlenin mi puitute pawh an bitum nasa hle.
US sorkar phei chuan hel pawlin an an lo chhawr ve theih emaw, mi beihna an thlen phah theihna puihna pek a titawp a, hei hian a mamawh ngawih ngawihtuten an chan loh phah nasa hlebawk.
Tanpuitu pawl hrang hrang chuan ram tam takin Ukraine indo avangin Somalia-a harsatna hi an ngaihthah phah niin an sawi.
January khan UN hnuaia Somalia-a humanitarian coordinator Adam Abdelmoula chuan puihna pe thin pangngaiten ‘an kut silin Ukraine lam an hawisan’ tih a sawi niin Associated Press news agency chuan a tar lang.
Thawhtannia report tihchhuah hi Unicef leh WHO pawhin an pawmpui niin London School of Hygiene leh Tropical Medicine & Imperial College London ten an zirchianna behchhan a ni.