Union Home Minister Amit Shah-a’n Zokhawsanga Assam Rifles headquarters chu April 1, 2023 khian hawn a tum thu Mizoram Chief Minister Zoramthang a hrilh.
Sorkar laipui dawra New Delhi-a cham mek, chief minister hian nimin khan Union Home Minister Shah chu a pisa-ah a kawm a. An inkawmnaah hian Shah hian April 1, 2023-ah Assam Rifles Battalion Headquarters Complex, Zokhawsang chu hawn ngei a tum thu leh Laldenga Cultural Centre din tur lungphum rawn phum a tum thu a hrilh.
Chief Minister Zoramthanga pawhin Mizo mipuite beisei leh nghahhlelh em em, sorkar hmachhawp lian tak ni bawkin a tak ram a thleng tur chu lawmawm a tih thu home minister a hrilh a ni.
Chief minister chuan Thawhtanni khan DoNER minister, Union Culture & Tourism Minister ni bawk, G. Kishan Reddy chu zanah a chenna inah hmuin an inkawm bawk a. Union minister nen hian Mizoram tana hmachhawp hrang hrang leh hmasawnna hnathawh mek dinhmun chungchangte an sawi dun a ni.