Heavyweight boxing a unified champion ni lai Oleksandr Usyk chu Tyson Fury nen undisputed heavyweight title fight a inhmachhawn tura tih an nih hnuah a inhnukdawk dawn a. Nilaini khan an inbiakna a kaltluang lova, inremna awm lova indawrna tihtawp an tum.
April 29 hian Wembley Stadium a inhnek turin hemite pahnih hi inremna lailawk neih a ni tawh a. An sum hmuh turah pawh inrem tawhin 70/30 split-ah Fury hian 70% a chang zawk ang.
Indawrna thui tak kal tawhin inremna nei nual tawh mahsela rematch neih dan turah an inrem thei lova, hei hi an indawrna a tawp chhan lian tak a ni.
Kum 34 mi WBC champion Fury lam hian ‘rematch clause’ awm hi an duh lova, hetihlai hian Usyk-a team te chuan inremna nei turin theihtawp an chhuah niin an sawi.
Kum 36 mi WBA (Super), IBF, WBO leh Ring magazine champion ni lai hian rematch clause neih a duh a. A tlawm pawhin rematch neih lehnghal theih a duh.
Hetihlai hian Fury chuan heavyweight title zawng zawng hmun khata a awm tawh a, rematch clause a awm chuan a kal darh leh mai a hlauhawm avangin a duh lo thung.