Cleveland Cavaliers in NBA Playoffs a an hmun tihchian an hnaih a. An elpui turte zing ami nih rinawm tak Brooklyn Nets chu 115-109 in an hneh.
Nilaini zinga Barclays Center a inkhelah hian Cavaliers in Nets court-ah hian 2nd quarter a an point hmuh hnem chu an chetthatpui a. A tawp thlengin tang tluan theiin hnehna an chang.
An star player Donovan Mitchell chu langsar in 3 points vawi nga lutin point 31 a score a. Cavaliers hian 3rd quarter-ah fal takin hma an hruai a, hei hi Nets in an pawtthla thei tawh lo.
Caris LeVert chuan point 18 score bawkin Cavaliers hian match 9 chhunga vawi sarih hnehna an channa a ni.
Eastern Conference-ah palinaah an awm mek a, regular season game 8 khelh hmabak an la nei a. An hmabak leh an team thlirin seeded number 4 chang thei tura an tan tluan theih a beiseiawm.
Team pahnihte hi Zirtawpni zingah an inkhel lehnghal dawn a. Cavs hi an chak a nih chuan an dinhmun a chiang teuh tawh hle ang.
Nets hi East-ah parukna an ni mek a. Tun hi a zawna vawi li an tlawmna a nih avangin pasarihna a awm Miami Heat nen an inthlau tawh lova. Khelh hmabak game 10 la neiin hetih chhung hian an dinhmun an siamtha a nih loh chuan Play In tournament an khelh a ngai dawn a. Playoffs-ah Cavaliers nen an intawn lehnghal theihna a lian hle bawk.