German federal prosecutor-te chuan Thawhtanni khan Russian scientist pakhat chu pawisa duh vangin German University atangin thuruk pawimawh tak takte Moscow hnenah a rukin a hlan chhawng thin nia an rinhlelh vangin man a nih thu an puang.
An mi rinhlelh, Ilnur N-a chu Zirtawpni khan police-ten an man tawh a, a lo berah October thla atang khan Russian secret service-te a pui tan tawh niin an ngai.
Ilnur N hi an man hmain German university, a hming an tarlan lohah natural sciences & technology department-a research assistant hna a thawk.
Federal prosecutor-te chuan nikum October leh kumin February inkarah Russian intelligence-te nen vawi thum lai an inhmu tawh niin an ring a. Tum hnih chu university huam chhung atangin thuruk an inhlan tiin an sawi.
A hnathawh avang hian sum leh pai a hlawh thin niin an ngai a. German thuneitute chuan an man hnu hian a hnathawhna leh a chenna hmun an dap nghal a ni.
Inrinni khan judge hmaah a inlan a, an hreng chhunzawm nghal.
Germany-in Russia tana enthlak hna thawk nia hriat an man hi ram pahnih inlaichinna chhiat lai tak a ni a, chumi zingah chuan Kremlin sorkar sawiseltu, Alexei Navalny-a tûra hrai vanga thichhawnga a awm hnua Berlin-a enkawl a nih pawh kha a tel.
German sorkar chuan Russia ramin Crimean peninsula a hnehchhuh vanga hrekna a siam chu kaltlangpui turin ruahmanna a la siam reng a, he hmunah hian Russia kal fir pawl leh tual chhung sipaite an la inbei deuh reng a ni.