Power & Electricity department-in kum 2023-2024 chhung atana hman tur kawlphetha hman hman a bithliah chungchangah Joint Electricity Regulatory Commission (JERC) for Manipur & Mizoram chuan nimin khan Aijal Club-ah mipui ngaihdan lakna a buatsaih.
JERC (Manipur & Mizoram) Chairperson Lalchharliana Pachuau kaihhruai hearing-ah hian power department officer-ten kawlphetha pek chhuah kawnga department ruahmanna siamte leh kawlphetha hman hman tihsan a tul chhante an sawi fiah.
Kawlphetha hman man tihsan rawtna duh loa dodalna thlentu, Mizoram Consumers’ Union (MCU), Mizoram Ispat Industries, Zoram People’s Movement (ZPM) party leh Vanlalruata, Tuikual South ten kawlphetha hman man chu tihsan belh an duh tawh lo thu an sawi hlawm a ni.
Objector zinga political party awm chhun, ZPM party chuan state budget atanga a lan danin mipui phurrit siam lovin budget atangin mipui chhawk zangkhai zawk turin ruahmanna siam a nih avangin mipui dinhmun enin kawlphetha hman man chu tihsan rih loh an duh thu an sawi a, mipui phurrit siam belh zawnga hmalakna chu tihtawp ngei nise an duh tih an sawi bawk a ni.
ZPM hian kawlphetha man tihsan an duh loh chhante sawi mah se an thu theh luhah affidavit an thil tel loh avangin commission record-ah dah a ni lo thung a ni.
Tar lan tawh thin angin, P&E department chuan kum 2023-24 atan kawlphetha hman man ennawn rawtin tuna hman lai mek atanga chhuta zaa 3.15-a tihsan a rawt a ni.
He rawtna anga tihsan a nih chuan subsidise hnuah unit khat Rs 8.08 a ni dawn a, tuna tariff hman lai mekah chuan êng chhit man hi unit khat Rs 7.83 a ni.
Hemi chungchangah hian JERC chuan public hearing-a telte ngaihdante ngaihtuah tel chungin kawlphetha hman man hi a bithliah dawn a ni.