- Engkima Colney; Editor, Rengkhawpui news (Vairengte)
Rilru ah thil tam tak ziah duh leh ziah chak a awm ve rualin he ram leh hnam, khawtlang tana tha ber tur erawh ziah chhhuah thiam a har viau thung si. Rilru in a vei len tak pakhat erawh chu Mizo thangthar ten Politics kan thlir dan diklo lutuk tawh hi a ni. Politics ah chuan diklohna/dawt chu thunei ber leh atel lova engmah tih theih loh a ngai, dawt var tal sawi ngei ngei ngai ni a hria, thangthar zingah kan awm ta nual a tih theih awm e. Heng mi ten an thlirna atanga han thlirpui chuan adik viau in alang tawh a. A chhan pawh he kan ram siamthatna bulpui ber tur Politics hi a chhe thei ang ber in kan siam mek a. A theih ang anga in sawichhiat tawnna hmun ah te, a tam thei ang ber eiruk leh hlepruk phalna hmunah te kan chantir a. Diklo zawk ni reng si a,dik ber anga lantirna hmunah te kan chan tir miau si anih hi!
Politics leh Pathian –
Mizo thangthar te zingah Politics leh kan Pathian dah hrang tlat pawh kan awm ta nual niin a hriat a. Hei hi kan nitin nunah kan seng lut ta mek zelin nun chawhpawlh, nun lem tak nei mek kan awm ta fur a tih theih awm e. A changin politics chhe chi, engmah thiang lo awm lo hmangin kan in bei tawn a. Kan party zawm pui anih loh chuan mi tha leh Pathian tih mi pawh nise a chhe thei ang berin chhuah kan tum tlat a. An mimal nun a chhe lai leh chetsual lai awm ang ang zawngin kan um zui duh zêl a. Hetihlai hian Kohhran leh a kaihhnawih thil tih ah erawh chuan Angel note ang mai a, pawisawi lo leh tha famkim angin lan kan tum leh fo si thin. He kan nun chawhpawlh in vet kual vang hian he zofate zingah milem, a tak ang tak tak an lo chhuah phah ta nual a ni. Kan Bible te leh kan Pathian thu hrang hrang te hi ngun takin bih in zirchiang ngat ila chu, Pathian leh Politics hi dah hran theih miah loh, thuk tak a in zawm vek a ni zawk a. Kristian ten kan rinna in nghahna Lal Isua Krista kha he lei leh vân ah hian Politician tha ber leh rintlâk ber a ni a, a zirtir leh a thupui ber, Nazareth manifesto ( Luka 4:16-18) pawh kha midang tana a nun pêk ral vek tur thu anih kha..
Mizo ten politics kan hmuh dan : –
Hetihlai hian kan ramah erawh tun dinhmun han thlir ila. Zaithiam leh rawngbawltu pakhat, a thusawina hrang hrang atanga ram vei ve tak pakhat in Political Party pakhat a zawm ve a. Enge an zawm chhan leh a tum dik tak pawh hriat pui tak tak silovin kan party a zawm loh vang te, kan mi huat zawng anih vang te leh sawisel nuam tih hrim hrim vang te in kan ngaihdan leh rindan thu phuah belh in a chhe thei ang berin kan han sawi chiam nghal a. Tun dinhmunah chuan he ramin a fahrin zingah mi tha leh dik, mi rinawm,Pathian tan pawh a mi tangkai tak tak te tan he kan ram Politics hi khelh ve ngamawm loh khawpin kan ram politics hi kan sawp chhe mek ani. Kan ram Politics chu dawt a in bum kualna vel leh setana zalen taka a lanna hmun atân kan siam mek a. Politician kan tih te chu mifel tak anga pawn lama lang a, a tul chuan dawt sawi hreh lem lo, sorkar sum tham zeuh zeuh leh mi chanhai te chan lâk sak zeuh zeuh ching pawh nise, An tlin lehna tur anih a, kan party mi leh sa anih chuan dawt pawh sawiin thup/ sawi mawi sak ngai ang chi te chu politician niin kan hre tlat tawh a ni. Kan Politician ni a kan hriat leh beisei ang tawk hi kan nei mek ni te pawhin a hriat a ni.
Ram leh hnam siam that chu tu tih tur nge
Hetiang ani si chuan kan ram leh hnam siamthatna ber tur Politics hi mihlemhle leh mi duham, pawisak neih lote chiah khelh tûrin kan dah reng dâwn em ni? Chung mite chuan kan ram min tih chhiat sak mek lai hi a thlirtu ah kan tang leh vek dâwn em ni? Nge ni, Biak In in leh a chhehvêl rawngbawlna atang chauh in kan ram chhe mek hi siamthat kan tum zawk dâwn? He kan Politics ngai dan diklo tak hi paih a, kan ram leh hnam, khawtlang nun siam tha tur hian Pathian tihmi, mi tha leh dik , mi rinawm tak tak ten Politics dik tak, kan ram leh hnam siam tha tur in lût zêl sela, kan ram politcs dinhmun chhe mek hi han siam tha zêl teh se. Sawisel leh diriamna kârah pawh chhel tak leh chak tak in kal ula. Khawvel a mifing inti te thu ni lovin kan rin Pathian thu hian chakna lo pe zêl che u rawh se. Party ah buai lo ula, nagmahni tan ni lovin he ram, he hnam mizo te tan nise, in ngaihhlut leh duh ber chu he ram leh hnam hi lo tlat reng teh se .Tin, mipuite pawhin he ram leh hnam, kan khawtlang nun hi siamthat a, kan tu leh fate tan he ram hi chenfakawm a siam kan duh chuan tun atang hian Politics dik tak, ram siamthatna, dikna leh rinawmna hi neih i tum teh ang u.