Aizawl : Mizoram University-a Department of Horticulture, Aromatic and Medicinal Plants (HAMP) chuan Mizoram-a loneitute tan ‘Kisan Mela leh Exhibition’ March ni 21, 2023 khan an buatsaih.
He Kisan Mela leh Exhibition hi Department of Biotechnology, Government of India hnuaia Biotech-Krishi Innovation Science Application Network Hub (Biotech-KISAN Hub) kaltlanga buatsaih a ni a, Mizoram district hrang hrang atangin thlai thar mi leh loneitu mi 300 chuang he hun hmang tur hian an kal.
Khuallian Mizoram University Registrar, Prof. Lalnundanga chuan kalkhawmte chu fuihin, “Mizoram University thiltum lian ber zinga pakhat chu MZU hnuaia thiamna leh zirbingna te Mizo mipui, a bikin lo kalkhawm loneituten an lo hman tangkai ve hi a ni” tiin, Prof. Shri Dhar, Dean, College of Horticulture, Thenzawl chu khual zahawm a ni bawk.
He hunah hian loneitu thawk tha mi 13 hnenah Progressive farmer fellowship leh mi 2 hnenah Budding agri-entrepreneur fellowship hlan a ni a, heng fellowship te hian cheng 10,000 leh lawmpuina thuziak a keng tel a. Loneitu kalkhawm ten an thil tharchhuah-te leh an thilsiam-te lei theih turin an phochhuak nghal bawk a ni.