Assam-a pa pakhat chuan ip khat tlat pawisa thir hmangin scooter a lei a, mak tih a hlawh hle.
Md Saidul Hoque-a hi Guwahati-a dawr tenau kai a ni a, scooter lei nan hian kum tam tak a intuak a, Rs. 1, Rs. 2, Rs. 5 leh Rs. 10 thir chu kum 5-6 vel a khawl a ni.
News agency ANI-in video an tihchhuahah Hoque-a hian ip khat tlat phurin showroom a pan a. Thawktute chuan an chhiar lauh lauh va, Rs. 90,000 lai a ni.
ANI-in video an tihchhuahah hian, “Assam: Md Saidul Hoque, Sipajhar, Darrang district-a chengin ip khata pawisa thir a khawlin scooter a lei,” an ti.
“Pawisa thir ka khawl hmangin scooter ka lei thei ta hi ka hlim hle a. Boragaon-ah dawr tereuhte kaiin scooter neih hi ka suangtuah thin a ni a. Kum 5-6 vel khawlin ka duh ka tipungtling thei ta a, ka hlim hle a ni,” a ti.
Thlalak dang an tihchhuahah dawr nghaktuin lehkha a ziak fel leh chabi an hlan lai a lang bawk.
Two-wheeler showroom neitu, Manish Poddar chuan, “Ka executive-in mi pakhatin kan showroom-a scooter chu pawisa thirin a lei duh tih min hrilh khan ka phur hle a, hetiang hi TV leh chanchinbu-ah ka lo hmu tawh thin a ni,” a ti.
Hoque-a chuan nakinah pawh lirthei ke li nei chi pawh a la lei theih ngei a duhsak thu a sawi a, anmahni a dawr duh chu a lawm hle tih a sawi bawk..