Putin-Xi inbia || China ruahmannain indo a tawp thei, khawthlang leh Kyiv an inpeih a ngai thung : Putin

China-in Ukraine tana muanna tura ruahmanna a siam chu indona tihtawpna tur bul tanna a nih theih thu Vladimir Putin chuan a sawi.

Hetih rual chiah hian Putin-a chuan ruahmanna hi kaltlangpui tur chuan ‘khawthlang ram leh Kyiv an inpeih a ngai’ niin a sawi tel.

Russian hruaitu hian Thawhlehni khan Chinese President Xi Jinping chu Moscow-a kawmin Ukraine nena an indo mekna bakah an ram hnih inkar thil an sawi dun.

China hian indona a tawp theih nana ruahmanna a neih chu thla hmasa khan a lo tichhuak tawh a; mahse, he thilah hian Russia chu Ukraine chhuahsan tura tihna a tel lo.

Point 12 nei ruahmannaah hian inremna tura inbiakna neih chu rawt lian tak niin eng intiamkamna mah awm lova mi ram chin inzahsak pawh a tel.

Ukraine eawh chuan an ram an luahsak mek hmun atanga Russia an chhuah hma loh chu inbiak a rem loh thu an lo sawi tawh a, Russia hian insuan chhuah a tum mai hmel rih lo bawk.

US Secretary of State Antony Blinken chuan Thawhtanni khan Russia an inhnuhdawh hmaa inkahhai puan a rawt a, ‘chu chu Russian an hminna tur leh awmze nei tur’ a nih thu a sawi.

Ci-a nena an inbiak zawha thuthar lakhawmtute an kawm dunnaah Putin-a chuan, “Chinese peace plan hian Ukraine-a buaina awm mek tam tak hi a ching fel thei niin a lang a; mahse, chumi tur chuan khawthlang ramte leh Kyiv an inpeih phawt a tul,” a ti.

Russia chuan lehlama tang mek lamah hian ‘inpeihna thawm’ engmah hmuh a la nei lo niin a sawi bawk.

Russian hruaitu kianga lo ding, Xi-a pawhin a sorkar chuan muanna leh inbiakna chu a thlawp tlat thu leh China chu ‘tun hma atang tawha a dik lama tang thin’ a nih thu a sawi bawk.

China chuan Ukraine chungchangah hian ‘tan bik a nei lo’ tih a sawi nawn leh a, Beijing chu remna siamtu a nih ve theih thu erawh a sawi.

Khawthlang ramah chuan China hian Russia hi sipai lama puihna a pek mai hlauhthawnna a lian mek.

“China hian Russia hnenah ralthuam tha a pe tih finfiahna chu kan nei lo va; mahse, Russia hian a dil ngei a, hei hi Beijing-a Chinese thuneitute pawh an inkhâp mekna a ni,” tiin Nato chief Jens Stoltenberg chuan Brussels-ah thuthar lakhawmtute hnenah a sawi.

China leh Russia ram hruaitute inbiakpawhnaa thuchhuah intawm an siamah chuan inkawmngeih tak ram hian ‘sipai leh politics-a tan dunna’ an siam loh thu an tar lang.

Thawhlehni tukah khan Xi-a hi a ni hnih nana inbiakna an neih tan dawnah Kremlin-ah nasa taka lawm a ni.

Moscow a tlawh theih chu ‘a hlim tak zet’ tih sawiin President Putin-a nena an inbiakna chu ‘tlang, inhawng leh thian hnai inkawm’ a nih thu a sawi bawk.

Xi-a’n Russia a tlawh hma lawk hian International Criminal Court chuan President Putin-a chu indonaa pawikhawiha puhin a manna tur thupek a chhuah a ni.

Leave a Reply

error: Content is protected !!