Assam Chief Minister Himanta Biswa Sarma chuan Maharashtra Chief Minister Eknath Shinde hnenah MLA pakhatin khawlaia ui tla thinte Assam-ah an ei atan thawn tura a tih chungchangah lehkha thawn a thawn.
Maharashtra MLA Bachchu Kadu-a hian he thu a sawi avang hian a lakah Assam-ah thubuai eng emaw zat ziah luh tawh a ni.
Kadu-a hian ui tla leh sa ei chungchang hi March 4-a Maharashtra assembly session-ah a sawi a ni.
A thil sawi avang hian Assam mite leh pawl hrang hrang chuan Kadu-a demna lantirin ngaihdam dil ngei turin an phut.
Assam assembly-a thu a sawinaah Sarma chuan, “Maharashtra chief minister hnenah an MLA zinga pakhat chuan a thu sawi hnuk kir turin lehkha ka thawn a ni,” a ti.
Sarma chuan Kadu-a thu sawi hi house-a record a nih loh chuan MLA lakah hremna lek theih a nih thu a sawi a; mahse, police chuan house chhunga thu sawi avangin engmah a ti thei lo niin a sawi bawk.
Shinde-a hnena lehkha a thawnah hian Sarma chuan Prahar Janashakti Party MLA Kadu-a hian a thil sawi avangin Assam mite rilru a tina tak zet tih a tar lang.
“Kadu-a hi a thu sawite hnuk kir leh tura ngen tur leh chanchinbumite hnenah a inchhir thu sawi tura ti turin ka ngen che a ni,” tiin Assam chief minister chuan a ziak.
March 7 khan Kokrajhar district Trinamool Youth Congress chuan Maharashtra MLA lakah hian police-a thubuai an thehlut.
March 10 khan eptu MLA-te chuan Assam Governor Gulab Chand Kataria-a hmuin Maharashtra MLA thu sawi avanga an lungawi lohna an thlen tawh bawk.