BJP chuan Ningani khan state president thar pali a ruat a, an zingah hian Lok Sabha MP C P Joshi chu Rajasthan-ah dahin OBC hruaitu, MLC Samrat Choudhary chu Bihar-a an party chief turin a ti bawk.
Party president J P Nadda chuan state minister lo ni tawh, Manmohan Samal chu Odisha unit-a an party chief atan a ruat a, Delhi working president Virendra Sachdeva chu party president atan a dah sang bawk.
Kum 54 mi, Choudhary-a hi kum 2018-a BJP a zawm hnuah a lar chak hle a, Bihar Legislative Council-a an party leader niin Kushwaha hnam atanga chawr chhuak niin an hnamah huhang a ngah hle a. Lok Sabha MP Sanjay Jaiswal chu a thlak a ni.
Kum 47 mi chauh, Joshi-a hian Satish Poonia a thlak thung dawn a. Poonia hi Jaipur-a Amber bialtu MLA niin Rajasthan BJP hruaitu hlun, Gulab Chand Kataria chu Assam governor-ah ruata politics-a a inhman tam theih dawn tawh loh avangin dinhmun sangah dah a ni ta a ni.
Brahmin chhungkuaa chhuak, Joshi-a hi Chittorgarh Lok Sabha bialah vawi hnih MP atan thlan a ni tawh.
Kataria ang bawkin Poonia hi chief minister hlui, Vasundhara Raje-i nena inmil tehchiam lo an ni thin a, ani hi an state-ah chuan BJP hruaitu hriat hlawh ber a ni.
Congress rorelna state-ah hian kumin kumtawpah assembly inthlan a awm ang.
MP hlui, Samal-a hi Odisha-a BJP hruaitu hriat hlawh niin a thlak tak, Samir Mohanty-a aiin a thawm a na zawk niin politics thiamte chuan an sawi.