Indian eptu hruaitu, Rahul Gandhi chu mi tihhmingchhiatna thubuaiah kum hnih chhung lung in tang tura tih a ni.
Gandhi-a hi Gujarat court-in kum 2019 inthlan laia Prime Minister Narendra Modi-a chungchang a sawi dan avangin thiam loh chantirin a hrem a ni.
Lung inah erawh a lut nghal mai dawn lo va, ni 30 chhung bail-a chhuah nghal rih niin hetih chhung hian a chungthu an relna hi court sang zawkah ngaihtuah tha turin a thlen thei bawk ang.
Congress party MP hi court-a a hremna tur puan a nih lai hian a awm ve a, ram inthlanpui neih nan kum khat chauh a awm tawh tihin a hremna hi tihfel a ni.
April, 2019-a inthlanpui neih lai khan Karnataka-a a campaign-naah Gandhi hian, “Engvangin nge rukru zawng zawng hian Modi-a hming ang (surname) an put? Nirav Modi, Lalit Modi, Narendra Modi,” tiin a sawi a ni.
Nirav Modi-a hi Indian diamond tycoon niin a tlanchhe kual mek a, Lalit Modi-a hi Indian Premier League chief thin niin tunah hian India-a cricket board chuan a dam chhung cricket-a inhnamhnawih tawh lo turin a hrem mek a ni.
Gandhi-a laka thubuai hi India-a rorel lai, BJP dan hre mi, Purnesh Modi-a thehluh niin Gandhi-a thu sawi hian Modi kaihhnawih hnam a tihmingchhia niin a sawi.
Hetih lai hian mi tam tak chuan hetianga ti tura thupek a hmuh vanga ti niin an sawi ve bawk.
Dan zirtirtu, Gautam Bhatia chuan ‘a hlawma mi hetianga tih’ ang chi, mi hming (surname) sawi hi ‘tu emaw tih bik a awm a nih loh chuan a titu laka hremna lek theih a ni lo’ niin a sawi.
“Tu emawin, ‘dan hre mi zawng zawng hi rukru an ni,’ ti ta sela, kei hi dan hre mi ka ni a; mahse, a lakah mi tihhmingchhiatna thubuai ka siamsak thei lo, keimi min bitum chat a nih loh chuan,” tiin Twitter-ah a tar lang.
Congress party pawhin Gandhi-a hian a thubuai chu ngaihtuah tha leh turin a ti dawn tih Twitter-ah tar langin, ‘kan bei ang a, kan hneh ang’ an ti.
Gandhi-a hian hremna an pek chungchangah hian engmah a la sawi lo va; mahse, Twitter-ah chuan Hindi-in Mahatma Gandhi thu sawin, “Ka sakhua chu thu tak leh tharum thawh lohnaa innghat a ni a. Thu dik hi ka Pathian a ni a, tharum thawh lohna hi chumiin a ken chu a ni,” tih a tar lang thung.
A dan hre mi, Kirit Panwala chuan BBC Gujarati hnenah Gandhi-a hian hremna puan a nih hnuah judge hnenah hian ‘mipui rorelna thatna tura kha thu kha sawi’ a nih thu a hrilh tih a sawi.
Gandhi-a’n hnehna a chan theih nan hian tanfung pali an nei tih a sawi bawk a, “A pakhatnaah chuan, Gandhi-a hi Gujarat-a cheng a ni lo va, complaint a luhna leh chhui a nihna hmun a ni daih si. Pahnihnaah chuan, Modi-a tih hnam leh khawtlang a awm lo. Pathumnaah chuan, Modi-a tih hming (surname) pute hi tumah inlaichinna nei an awm lo, a tawp berah chuan, Gandhi-a thu sawiah hian tum reng vanga mi tihmingchhiat duhna a awm lo,” a ti.
India-a mi tihhmingchhiatna dan hi British-ten an awp lai atang tawha hman kha niin a na berah kum hnih lung in tan emaw, pawisa chawitir emaw, a pahniha hrem kawp emaw a theih.
Mahni duh leh ngaihdan sawi chhuah theihna zalenna la vawngtute chuan he dan hian zalenna a tichep niin an sawi thin a, an sawisel duh politician tam tak pawh an sawi ngam loh phah niin an sawi thin.
Kum 2016 pawh khan Indian politician lawk tak tak, Gandhi-a ngei pawh hi telin, he dan hi hman tawh loh tura ti turin petition an lo thehlut tawh a. Supreme Court chuan paih ngai lovah ngaiin ‘miin a duh a sawi theihna zalenna hian mi dang a tihmingchhe thei tihna a kawk lo’ tiin thu a rem ta zawk a ni.