UFC women’s bantamweight champion ni tawh Holly Holm chuan mixed martial arts chawlhsan mai a la tum lo hle. Vawi ruk inlan theihna contract thar UFC nen an ziak tih a manager Lenny Fresquez chuan a sawi.
Kum 41 mi Holm hian tun kartawpah hian UFC Fight Night-ah Yana Santos a hmachhawn dawn. UFC women’s bantamweight rankings-ah pathumna ni mekin parukna ni lai Santos lakah hian a dinhmun tha hum a tum dawn.
14-6 MMA record nei Holm hi nikum May thla khan sawi hlawh takin Ketlen Vieira lakah a tlawm a. Split decision hmangin a khingpui hi chaktir nimahsela thenkhat chuan Holm hi a chak zawk loh pawhin majority draw ni tal turin an ngai.
Hemi hma hian Holm hi International Boxing Hall of Fame-ah lakluh a ni a, kum 2013 khan professional boxing atang MMA-ah zuang lut mahse nikum khan boxing lama kir leh hi a lo sawi lang tawh. Nimahsela a hnu lamah erawh MMA-ah chauh a insawrbing tih a sawi.
Kum 2021 hnuah erawh inhliam avangin Octagon chhungah vawikhat chiah a la inlan thei a, inlan tam lo mahse title inchuhnaah erawh a buk a la rit viau tho.