Mizoram State Election Commission (SEC) chuan Mara Autonomous District Council (MADC) huam chhunga VC 99 inthlan neih hun atan April 18, 2023 a ruat.
SEC Laima Chozah chuan nimin khan a pisaah thuthar thehdarhtute kawmin MADC huam chhunga VC thlan hun tur hi a puang.
SEC-in a sawi danin, inthlana chuh tumte tan March 24 atangin hming pek luh tan theih a ni dawn a, hming pek luh theih hun hi March 30 chawhnu dar 3 thleng hawn a ni ang a, chungte chu a tuk, March 31-ah endik tur niin, inhnukdawk leh duhte tan April 3 chawhnu dar 3 thleng hun hawn zui a ni ang, hemi ni vek hian candidate-te symbol pek chhuah a ni ang a, April 18 zing dar 7 atanga tlai dar 5 thleng vote thlak a ni ang a, hemi ni vek hian vote chhiar a ni ang.
Laima Chozah chuan inthlan kaihhnawiha mipui hriat tur hrang hrang sawiin model code of conduct chu nimina inthlan puan a nih atang hian hman tan nghal tur a nih thu a sawi a, VC thlanna neih tura district election officer atan Siaha bawrhsap ruat a ni a, amah puitu atan Addl. DC chu Asst District election officer atan an ruat thu leh returning officer, presiding officer leh polling officer te an ruat fel tawh thu a sawi.
Inthlanna felfai leh muanawm neih a nih theih nan inthlan buaipuitu te, political party, NGO leh mipuite tawiawmna an ngen tih an sawi a, “Mipui duhthlanna kaltlanga tual chhung inrelbawlna tha tak kan neih zui zel nan MADC huam chhunga khaw 99-a mipuite kan sawm a ni,” a ti.
MADC huam chhungah hian VC 99 awmah seat 591 a awm a, chung zinga 99 chu nominated seat a ni a, mipuiin an thlan tur chu seat 492 a ni a. Vote nei mipa 20,794 leh hmeichhia 22,326, an vaiin vote nei mi 43,120 an awm.
VC 99 zingah New Siaha ‘E’ I VC chu voter tamna ber niin vote nei 1,184 an awm a, voter tlemna ber chu Riasika VC niin voter 96 chauh an awm a ni.
Hming pek luh theih hun March 24-30
Endik hun March 31
Inhnuhdawh theih hun tawp April 3
Vote thlak hun April 18
Vote chhiar hun April 18