Peren district, Nagaland-a mipui kaihhnawih pawl hrang hrangte chuan Thawhtanni tlaia mi pathum thah an nih duh loh lantir nan nimin khan bandh an huaihawt.
Lamhainamdi khuaah mi tu tih hriat lohten mi pathum an kap hlum a. An kah hlumna hmun hi hna an thawhna lovah a ni a, tlai dar 5:00 vela thleng a ni.
Mi thah an nih bakah hian an lirthei leh khuaa in thenkhat hal a ni bawk.
He thil thleng duh loh lantir nan hian nimin khan bandh an huaihawt a. Nagaland Zeliang People Organisation (NZPO) President Kevipelie chuan Peren district-a sumdawnna hmun, sikul leh pisa zawng zawng khar tura an tih angin khar a nih thu a sawi.
Mipui eng emaw zat chuan nimin khan Lamhainamdi khua hi panin mitthi hi an vui a. An kal chhuah hmain Jalukie-ah innghakkhawmin he thil thleng an duh lohna hi an lantir bawk.
Tualthahna thleng hi chhui zui mek a ni a, a titute pawh man thuai an inbeisei tih police chuan an sawi.