Barcelona midfielder Pedri chuan Copa del Rey semi-final second leg a khel thei dawn lova, Real Madrid nen an mikhual hunah a la dam hman dawn lo.
Kum 20 mi Pedri hi February thla khan Manchester United nen Europa League playoff a an inkhelh tumin a malah tihrawl hliam a nei a, hemi hnu hian a la inkhel leh lo.
Tunkarah April 6 a khelh tur tun season a El Clasico tum nga na hi a khel ve thei dawn niin beiseina awm hman mahse a thei dawn lo.
Ningani khan group training a zawm a, nimahsela a hliam awmna lai tihrawlah harsatna a awm avangin Barcelona an fimkhur a, training zawm tir an hmanhmawh lo.
Pedri chawlh hunchhung tur hi sawi a ni lova, league lamah point 12 laia Barcelona an san tawh avangin hmanhmawh nachhan tur a awm lo bawk.
Hmun thenkhata an sawi dan erawhin kar thum leh kar li inkar vel bawr a ni dawn niin an sawi.
Ani bakah hian Barcelona hian Clasico-ah hian Ousmane Dembele, Ronald Araujo leh Frenkie de Jong te an chhawr thei dawn em tih zawhna an la nei vek.
Araujo leh De Jong te hi Pathianni khan Real nen an inkhelh tumin an inhliam a. Dembele erawh January thla tawp atangin a la inkhel leh lo.