Aizawl: Nimin zing khan taxi (Eco-Van) MZ-04/7714 chu Khawzawl leh Champhai inkar national highway laih tharah a chesual a, a neitu leh a khalhtu, R. Lalsangzuala (41), Khawzawl Vengthar a thi.
Thudawn danin Sangzuala hi Nilaini khan |iau-ah bungraw la turin a kal a, zan dar 7 pelh hretah Champhai Khankawn Police Check Gate a paltlang a. Check Gate a pelh atanga hun rei vak lovah a chhungten biakpawh an tumin an be tlang thei ta lo va. Zanah haw tak loh avang hian nimin zing khan a chhungte chuan an zawng a, zing dar 9:30 vel khan kawngthlanga a taxi tlan liam chu an hmu ta a ni.
A hmuna kalte sawi danin taxi hi a ke hma lam vei lam a chhiat bakah a tlan liam dawna kawngpuia a ke hnu hma atanga a lan danin a tlan laiin a ke hma lam vei lam hi a tlan puak a, hei vang hian a taxi hi thunun thei lovin kawngthlangah a tlan liam ta ni ngeiin a lang a, feet 200 vel zeta thui a lum a, a chhe hneh hle a ni.
Sangzuala hian a lu-ah hliam na tak a tawrh bakah a taksa hmun thenkhatah hliam a nei bawk a. A ruang hi la chhuakin Khawzawl District Hospital-ah postmortem a ni a, nizan khan lumen a ni a, vawiinah vui a ni ang.