- Dr. C. Lalrampana
A KAMKEUNA
Zaithiam Hmangaihzuali (Zualbawihi) hla sak-“Hrilh ka hai lunglam ka vai, Tiamthu sut hmang nunrawng maw ka lo tawn che” tih hla hian rilru a va’n hneh tehlul êm! Tiamthu sut hmang lem ang der thiam hi zawng mi rinawm tan chuan a huathlalawm thin reng asin? A rilru na lutuk chuan-“Hetiang leh tura sut leh zai min relsan mai hi A na asin.” tiin a tlip zui a, mahni chana han dah chhin hian a nat turzia leh hrehawm turzia hi sawiin a siak lo. Ka rãwlthar laiin khawvela ka duh ber leh ka hmangaih ber, runlum nuthai chanpui tur leh fanau maltluan chawia tar kun khup bih ela dam chhung hun hmanpui tura ka lo thlan fel diam tawh ka di bawih mampuii chuan, beiseiloh takin samang thenna biahthu, thai kawi bãwngte palai hmangin min han hlãn mai chu a na ka va’n ti tehlul em! Nula tleitiri zun ngaia ka tah vawi khatna ni mah se ka cher phah bawih a, ka mit khur a tla dãwk thei nia! Mahse, beidawngsei pah chunga rilru tawngtaina nen theihtawpa nitin a ruka ni tla vanvuaia tuk loh ram dãi chhãwl thing hnuaia tahzai rela ka beihna chuan rah tha chhuahin ka di bawihmampuii chu lung chhirin lamang a lo letleh ta hlauh mai a; ka va’n lãwm tehlul em! Mahse, chung khuanu ruat loh kan ni aniang- “tiam tlat e” kan ti thei ta chuang lova, amaherawhchu, MUP member nih thleng pawhin thinlai rukah nghilh ni reng a awm thei tawh chuang lova; Seol thlan thim lamtluãng pan tura hnuk chah hma lawk thleng a daih dawn a nih hmel hle!
TUTE NGE THU TIAM THIN?
Nula tlangval; nuthlawi pathlawi; nula pathlawi; tlangvãl nuthlawi; mi nu mi pa thleng pawhin inhmangaiha inngaizawng leh nupa tura inbuatsaihte hian hmangaih biahthu di inhlãnin tiam thu di an thlung thin a ni. Chutianga a lo hlawhtlin hnuah chuan Pastor/Kohhran upa kal tlangin Pathian leh kohhranho hmaah dam chhung daih tur inneih thutiam an tiamleh thin a ni. Tin, President; PM; Governor; MLA & Minister-te hian rorelna thutphaha an thut dawnin rinawmna thu an tiam thin. Hetiang zel hian rorelna in high court & supreme court judge tur te; sipai hotu, Kohhran hruaitu lawk leh pastor, Evan, missionary etc. thlengin rinawmna thu tiamtira lãkluh an ni thin. Ram dãnpuiin a phut anga rinawm taka awm tura thu an tiam hnuah an thutiam anga an rinawmleh si loh chuan an dãi pelh angzia zelin an chunga thuneitute’n an phu tãwk hremna an pe thin. Mahni thutiam bawhchhiaa rinawm lote chu tuman an ringleh tawh ngai lova an ding chhuakleh tawh ngai hek lo.
THUTIAM DANG
Tãrlan takte bakah khian khawtlang hruaitu, NGO leh political party hruaitute hian. Inthlan dawn apiangin political platform atangin vote an hmuh tam theih nan an tih theih loh tur thleng thlengin mipui hmaah thu an tiam a, an invaupüm a, an inchhekarbawm thin. Ka la hriat reng fo chu Congress Ministry Pu Hãwla hun laia inthlan campaign thinnaah khan tuna FLAM president ni lai Pu Liansuama leh Pu Saikaphiangate hun 1983-2005 lai vel khan kawrthah leh. Phuldungsei bial huam chhunga awm Bru leh chakmaho vote hui tam theih nan political party thenkhatte khan tangkåwng manna khãwl pek an tiam thin a, mipui lam lahin tak tak emaw tiin an vote tlingleh mai thin ni khan a lang a; mahse, tun thlengin tangkãwng manna khãwl an sem ãwm thãwm hriat tur a la awm chuang hlei lova. Hetiang tho hian tun thlengin inthlanpui kan hmachhawn apiangin political party hrang hrangte hian amah Pu Hãwla tihdan takah party manifesto an inziah that siak thin a, an tih theih loh tur thlengin ziakin an tlãngzarh a, an ãupui dum dum a, an intiam kur zut a, a tak erawh hmuh tur a vãng hle thin. Hetiang hian kum 41 (1972-2023) chhung zet a ni ta; kan ram politician-te hian Zoram mipuite hi hmusit takin min bãwl phuan tawh thin a; mipui tam takin la hrethiam lo mah se, a tam zawkte hi chuan mipui min bãwlna hi chu kan hre tlangpui tawh a, chuvangin, kumin kum tawpa inthlanpui kan hmachhawnleh turah hi chuan political party-te hi an fimkhur a ngai tawh hle ang. A hma ang bawka mipui bãwl kualleh an tum a nih chuan mipuiin artelukãwn vek khawpin an bãwl let ve thei a ni tih hria se a lãwmawm ngawt ang .
A TLÃNGKAWMNA
Pu Lalthanhawla hruaina hnuaiah New Land Use Policy (NLUP) scheme kha 14th January 2011 khan hman tan theih tura vãwm chhuah (launched) a ni a, khatih lai khan kan political leaders-te khan NLUP scheme tihhlawhtlin nan political platform atangin in tinah kum 5 chhungin ?. 1,00,000/-(nuai khat) theuh sem an intiam a. Mahse, thu vauk mai a lo ni a, tang thàwm ang maiin a thãwm a ring a, a tak erawh hmuh tur a awm lêm lo. Chutiang zelin 19th September 2012 khan tuna kan Chief Minister Pu Zoramthanga hian Socio Economic Development Programme (SEDP) Scheme a rawn vãwm chhuak (launched) veleh a. He scheme tihhlawhtlin nan hian political platform atangin political leaders-te khan in tinah ?. 3, 00,000/-(nuai thum) sem an intiamleh kha a ni a, mahse, kum 2023 ral dawn hnaih tawhah pawh a tak hmuh tur a la awm chuang lém lo. SEDP an sem chhun pawh ?. 25,000)- chauh a ni a, an thutiam hlen tur chuan hmabak a la ko hle. Kristian zaa 85% awmna ram kan ni a; Pathian thu kan hre rilin ka sawi peih hle a, a taka nunpui erawh kan tum chuang hauh si lo. Pathian thuah chuan-“Thu tiama hlen si loh ai chuan tiam loh law law hi i tan a tha zawk.” (Thuriltu 5:5 ) tih a ni a, kan ram hruaitute hian an tih theih loh tawp tur an tiam a, an ti theileh der si lo,; tiam lo law law se a tha zawk tur? Chuvangin, kan ram hruaitute hi tiamthu sut hmang der thiam mai an lo ni e.