MNF Sr. vice president, dy. chief minister ni bawk, Tawnluia’n Assam Rifles-te Aizawl atanga Zokhawsanga insawn turin an inthiar chhuak tan mek niin a sawi.
Lungleia MNF party pisaah nimin khan thuthar thehdarhtute kawmin he thu hi a sawi a. Assam Rifles sawn chhuak tura MNF Founder President Laldenga hmalak tawhna bawh zui zel nia sawiin, chief minister hmalakna avangin AR-te chu an inthiar chhuak tan mek niin a sawi.
AR chhuahsan tur ram chu mi mal kuta a luh lohna tura dan siam a nih bakah cabinet meeting-in AR rama LSC neite chu tihtawpsak a rel tawh tih a sawi a. AR chhuahsan tur ram chu mipuite tan tangkai taka hman a nih tur thu a sawi.
Nimin vek khan AR hotute chuan thuthar thehdarhtute zawhna chhangin Zokhawsanga an hmunpui thar tur chu peih fel a la nih loh avanga an insuan luh vek theih rih loh tur thu leh an bungrua tlem azawng an dah phei mai chauh a nih thu an sawi a. Tuna Aizawl khawpui chhunga an awmnate chu chhuahsan vek thei an ni lo niin an sawi bawk.
Tar lan tawh thin angin Zokhawsanga AR Complex chu April 1, 2023-ah Union Home Minister Amih Shah-a’n a hawng dawn a, hemi atana inbuatsaih nan hian home department hotute leh AR hotuten March 15 khan helai hmun hi endikin inkhawm liantham buatsaih a rem ri lova ngaiin Vanapa Hall lamah AR Complex hawnna chu nei turin sorkarah rawtna an thlen nia thudawn a ni.