Aizawl: Association for Voluntary Blood Donation (AVBD) leh Mizoram State AIDS Control Society (MSACS) thawkdunin nimin khan Tourist Lodge, Chaltlang, Aizawlah Training of Blood Donor Motivator an buatsaih a, tlawmngai pawl leh kohhran thalai pawl hruaitute an tel.
AVBD President C Lalnunnema’n Mizoramah a thlawna thisen pek a pung zel nia sawiin hemi kawngah hian tan lak zel erawh a tul a sawi a. Voluntary blood donation chungchang leh thisen pe tura mi rilru hneh dan chungchangte zirhovin sawihona hun an hmang bawk.
AVBD genral secretary report-a a lan danin March 10, 1991-a din, AVBD-in a tum ber chu damloten an mamawh hun taka a thlawna thisen thianghlim an dawn theihna tura hmalak a ni a. AVBD hian branch pariat a nei mek.
Mizoramah a thlawna thisen pek a pung zel a, kum 1993-ah blood bank-a thisen pek zinga za-a 1.79 chauh a thlawna thisen pek a nih laiin kum 2022, December-ah chuan thisen pek zawng zawng atanga zaa 92 chu a thlawna thisen pek a ni tawh a ni.