Aizawl: Nimin khan Fisheries Minister K.Lalrinliana chuan Khawzawl Darngawn Veng DC Office Complex-ah District Fisheries Development Officer (DFDO) Office a hawng.
Hemi pual inkhawm tawi, Khawzawl DC Conference Hall-a hmanah fisheries minister chuan disheries department chu department lian lo tak leh hna pawimawh tak thawk a nih thu sawiin, Khawzawl district-a mumal leh changtlung zawka hnathawh theihna tura pawimawh hmasa DFDO Office, Khawzawl District hawn a ni leh thawktu turte dah fel a ni ta chu lawmawm a tih thu a sawi a. Thawktu indaih lohna leh hmanraw changtlung tawk lo chunga department hnuaia thawktute inpeknain rah tha tak a chhuah thin chu fakawm a ti a. Ei leh bara intodelh thei tur leh kan ram thar chhuahte tam zawk hralh chhuah a nih theih nan tan lak nasat a ngaih thu sawiin, “Lui dung nungcha inthlahpung chak takte chu ei leh bara intodelh theihna tura awlsam leh rang thei ber turte zinga mi a ni a; tiduhdah mai lovin a humhalhna lam kan buaipui a ngai a ni,” a ti a. Lui dung nungchate humhalh kawnga khaw hrang hrangah harh tharna a thleng mek leh department leh YMA thawhhona tha tak a awm chu lawmawm a tih thu a sawi a. “Kan zavaiin disheries department thlawptu leh lui dung nungcha humhalhtute kan ni thei a ni,” a ti bawk.
K.Lalrinliana chuan sangha leh lui dunga nungcha awmte tihpun leh humhalh kawngah inzirtirna tam zawk neih tum a nih thu sawiin, a man dan leh man hunte bakah an inthlahpun dante chena hriat tlan a pawimawh a, sangha inthlahpunnaa harsatna siam thei lui dung nungcha dangte thlen theite chena ven a pawimawh a ni,” a ti.