Hair cut & Style: Hmeichhia te aiin mipate hian sam chei, leh duan vel dan hi an lo bei uar zawk viau mai a ni awm a, lumeh ringawt pawh hi thla khat chhungin vawi khat chu meh ngei a ngai thin a, hmeichhia te aiin an sang filawr.
Style hlui leh tun lai lo deuh ang chi reng reng i lu-ah khan vuah suh. Nangmah cheitu che hnenah khan tunlai ve tak, mawi bawk si a tihdan tur zawt thin la. I sam, vun leh hmel landan nena inmil tur phei hi chu i hriat ngei ngei a ngai ang.
A nih loh vek paw’n heti ang lama chinchang hre deuh hair stylist te ngaihdan lak a pawi reng reng lo. Color hman tur te, a landan tur te leh style thar hmanna tur chung-changah pawh duhthusam anga chei thei turte chauh i thlang dawn nia.
I sam kha a tlem a, a pan deuh bawk si a nih chuan nileng lenga inkhuih buai kher ngai lovin tawi tein met mai la, a nih loh vek leh Hollywood star Bruce Willis ang deuhin ziat kawlh vek mai rawh.
Sam buk leh hnawk ve tak nei i nih chuan mouse/gel emaw styling product thenkhat zinga for frizzy hair an tih ang chi hi lei la, hmang bawk ang che. I hriat ngei ngei tur chu sam mawi leh nalh tak nei tur chuan a hmasain ei leh in lamah duhtui hle tur a ni a, chutih laiin mahni tlin bak baka ei leh in erawh a tha lo thung. Chaw hrisel ei that a pawimawh hle a, hunbi neih a ngai thung.
Sam color: Tun lai hian sam color- na tur chi hrang hrang a tam ta hle mai a, hengte hian sam lan dan leh awm dan turah kawngro a suin, style mawi takin a siam thei a, thenkhatte’n an hmang tangkai hle bawk. Heti anga sam chei i tum a nih chuan fimkhur erawh a ngai a, sam nei tlem ten an han hnawih hian sam bu a chhah deuh nghal nite hian a lang thei.
‘Just For Men’ tiha an siam chhuah, sam colour na hi a lar hle a. Khawvel market-ah pawh a din-hmun a thain, mipain an lei sup sup tawh a, he-tiang hnawih pha chin chu an class vah mai an ti hial a ni awm e. Hman chhin a sual lo.
Engpawh nise, tleirawl chhuah tirh hian lanmawi loh hlauhna hi mihring tute pawh hian kan nei vek a. Hmeichhe lamin sam an chei chuan mipa pawhin an ti ve nghal mai a, a awm lohna a awm reng reng lo. Thil reng reng hian hun lai a nei vek a, sawisel vak chi pawh a ni lova, hun a rei a zawi zawiin a ral ve leh mai.
Chutih laiin, sam i chei dawn a nih erawh chuan chei hmain fimkhur taka thil kalpui hmasak phawt a tha a, i vun in a ngeih chiah em tih leh sam tan malsawmna a thlen ang em tihte chu inzawh ngei ngei ni bawk se.