Afghanistan-a sikulte chuan zirna kum bul an tan leh ta a; mahse, Taliban-in secondary school chinah kai an phal ve loh avangin tleirawl sang tam tak chuan sikul an kai ve ta lo.
Education Minister Habibullah Agha chuan pawl ruk thleng ‘hmeichhe naupang tan sikul kai phal’ a nih thu a sawi a, high school chin atang chuan an khap tih a sawi.
Madrassas (Islamic school)-te chu hmeichhia tu tan pawh zirna hmun atan hawn a ni thung.
Kabul-a pawl kua zirlai, Yalda-i chuan madrassa-te chu sakhaw thil zirna hmun tha tak a nih thu Al Jazeera a hrilh a. “Mahse, madrassa atang chuan doctor a nih theih loh va, kan zir ve miah lo a ni,” a ti.
Pawl 10 zirlai, Sara-i pawhin sikul hawn chu ‘engtik lai pawha’ a suangtuah thin a nih thu a sawi bawk.
“Engtik ni-ah emaw chuan sikulte hi hawng vekin ka zirna ka chhunzawm thei ang a, beiseina ka la nei reng,” a ti.
August, 2021-a United States kaihhruai ram dang sipaiten an puih sorkar hmasa hnua Taliban-in thuneihna an chan leh atangin Islam sakhaw dan khauh takin an kalpui mek zel.
Secondary school china hmeichhiate luh phal loh hi nikum March atanga an kalpui tan a ni a, hemi hma lawk hian education ministry chuan hmeichhia leh mipa tan sikul a hawng tan a. Khawi Muslim ram mahin hmeichhe zirna khap an awm ve lo.
December thlaa hmeichhiaten university-a an zir khaptu Taliban hruaitute hian hmeichhiate tana secondary school hawn chu an duh dan anga thil kaltir an tum pawm a nih chauhvin a theih dawn thu an sawi a, heng zingah hian an zirlai chu Islam lam hawia thlak vek a tel a ni.
Taliban sorkar thuneitute hian sikul leh hmeichhiate zalenna nasa taka an khuahkhirh chhan chu ‘an tan a him loh vang’ niin an sawi bawk a. Hetih lai hian an hruaitu hlun thenkhat chuan Islam sakhua chuan hmeichhiaten lehkha an zir leh hna an thawh a phal niin an sawi ve bawk.
Kum 1996 leh 2001 inkara Taliban-in thuneihna an chan hmasak tum pawh khan hetiang khuahkhirhna dan tho hi an lo hmang tawh a ni.
United Nations Children’s Fund (UNICEF) Executive Director Catherine Russell chuan Taliban rorel dan hi ‘a pawi tak zet’ tiin a sawi a. Hmeichhe tam takin an nih tur an lo suangtuah thin chu an tihbosak vek niin a sawi.
Hei bakah hian an ram pawhin a tuar hle dawn niin a sawi a. A bikin hmeichhe nurse leh doctor an tam avangin an damdawi inten nakin zelah an la tuar thei dawn niin a sawi.
American University of Afghanistan-a law assistant professor Haroun Rahimi pawhin hmeichhiate zirna khap hi ‘chhut chhuah rual loh khawpin Afghan thalai leh an ram hmalam hun tan a tha lo zawk dawn’ niin a sawi bawk.
UN Assistance Mission to Afghanistan (UNAMA) pawhin thuneitute hi hmeichhiate zirna an khap hlip turin Thawhlehni khan an ngen.
Ram dang atanga an ram puitu pawl tam tak pawhin hmeichhiate zirna an pek hnuah chauh puih chhunzawm leh Taliban sorkar pawh an pawm tur thuin an vau bawk.
Tun thleng hian eng ram mahin Afghanistan-a Taliban rorelna hi an la pawm lo a ni.