King Charles III-a’n France ram tlawh a tum chu President Emmanuel Macron-a’n a ngen angin a hun sawn a ni tih Downing Street chuan a puang.
France-a Elysée Palace chuan thutlukna hi pension hun chungchanga lungawi lohna lantir kal mekah a ni 10 nan Thawhlehniah pawh kalpui tumna a la awm avangin a siam ta ani.
Paris leh Bordeaux tlawh tura ruahman hi Pathiannia tan tur a ni a; mahse, France-ah hian January atanga tan tawh duh lohna kal mek zelah Ningani khan tharum thawhna nasa tak a thleng thar a ni.
Buckingham Palace pawhin lal zin hun tur hi ‘France dinhmun avangin’ sawn a ni tih a sawi.
Thuchhuah a siamah, “Majesty-te hian a hma thei ang bera France tlawhna hun remchang an dap ang,” a ti.
UK sorkar chuan thutlukna hi ‘a khawi lam pawh inrawnin, France president-in British sorkar hnenah tlawh hun sawn tura a ngen angin’ siam a ni tih a puang.
President Macron hian Zirtawpni khan lal hi a bia a. Elysée Palace hian a hma thei angin tlawh hun chu a siam dawn tih a sawi.
French khawpui eng emaw zatah Ningani khan sorkarin pension kum tihsan a tum dodalna lantirin mi an pungkhawm leh a, a hmaa muanawm tak ni thin kha buaina a chhuak nasa hle.
Bordeaux-a town hall luhna hal a ni a. Khawpui berah pawh tear gas phuh ngai hialin boruak a awm a, Interior Minister Gérald Darmanin chuan March 6 atang khan hmun 903-ah kangmei a chhuak tawh tawh niin a sawi.
King leh Camilla hian Paris lailia Champs-Elysées zawh tur an ni a, Versailles-ah President Macron nen an inbe dawn bawk a. Queen Consort hian Paris khawpuia mi hiptu lian tak tling, art exhibition, Musée d’Orsay an tih chu a hawng dawn bawk a. Bordeaux an tlawh zui dawn bawk a ni.