Argentina in World Cup an champion hnuah a vawikhatna atan inkhel an hmachhawn a. Panama nen friendly khelin 2-0 in hnehna an chang.
He inkhelah hian Lionel Messi chuan freekick atangin goal a khung a. Professional football a khelh hnua a goal 800-na a khung.
Kum 35 mi Paris Saint-Germain forward hi goal 800 khung tling thei pahnihna niin Cristiano Ronaldo nen chiah he mellung hi an la kai.
Messi hian club football-ah Barcelona tan goal 672 khung tawhin PSG tan goal 29 a khung a. Ram tan goal 99 a khung ve bawk a, World Cup final-ah goal hnih a khung.
Estadio Más Monumental a inkhelah minute 89-naah Argentina captain hian an goal hnihna a khung a. Argentina tan tunlaia midfielder ngaihven hlawh ber pawl Thiago Almada chuan minute 78-naah goal hmasa zawk a khung.
Thawhlehni zanah Argentina hian Curacao an hmachhawn leh dawn a, Messi-a’n ram tana goal 100-na khung theihna remchang a nei dawn.
Inkhelh hma hian Argentina team in khelmualah, an fans te hmaah World Cup trophy chawiin lawmna hun an hmang a. Messi chuan mipui hnenah, “He hun hi ka suangtuah fo thin a ni a, in kianga hnehna lawm hi ka suangtuah thin.”
“Kan ramah ngei Copa America han sawi a, Finalissima leh trophy ropui ber World Cup han chawi hi ka duhthusam a ni.” tiin a sawi.
Coach Lionel Scaloni chuan, “Heng player-te chungah hian ka lawm a, anni vang hian World Cup-ah kan champion.” a ti ve bawk.