India-a parliament chuan eptu hruaitu hlun, Rahul Gandhi chu member a nihna atangin a chawlhtir (disqualify) ta a, a hma ni chiah khan mi tihhmingchhiat thubuaiah kum hnih lung in tang tura hrem a ni.
Parliament-in Zirtawpnia hriattirna a tihchhuahah Gandhi-a hi rorelna in hniam zawk, Lok Sabha-a member a nihna chu ‘hlihsak’ a ni tih a tar lang.
Gandhi-a hi kum 2019-a inthlan campaign-naah Prime Minister Narendra Modi-a hming (surname) a sawi dan avangin court-in a hrem.
Gandhi-a hi Congress party MP niin Kerala-a Wayanad bialtu a ni mek.
Gujarat court chuan ni 30 chhung bail-a chhuahtir mekin hetih hun chhung hian court dangah a chungthu an relna chu a thlen leh thei ang.
An party chuan a chunga hremna lek chu ‘dik lo leh rintlak lo’ tia sawiin MP atanga paih a nihna pawh ‘dan hmang leh politics hmangin’ an bei let dawn tih an sawi.
Zirtawpni vek khan Congress kaihhruaiin eptu hruaitute chuan Delhi-ah Gandhi-a chunga thil thleng duh lohna lantirin kawng an zawh.
Video leh thlalak thehdarhah chuan parliament tual hnai mai, Vijay Chowk-ah venhimna khauh tak karah eptu hruaitute hi pung khawmin banner lian takah ‘mipui rorelna a derthawng mek’ tih ziak an keng.
TV channel-te chuan kalsawn tura an tih an duh loh avangin venhim hna thawktuten MP an man nual niin an tar lang.
MP rualte hian President Droupadi Murmu-i chenna, Rashtrapati Bhavan thleng kawng zawh an tum nia sawi a ni.
Congress chuan sorkar lakah lungawi lohna lantir zui zel an la tum tih an sawi.
Kum 2013 khan Supreme Court chuan thupek siamin dan siamtu (MP)-te chu thubuai an neihah thiam loh chantir an niha kum hnih leh a aia tam tang tura hrem an nih chuan parliament member an nihna hlihsak nghal tur an nih thu a tar lang.
Gandhi-a hi MP a nih zui dawn loh bakah hian hremna an pek hi tihkhawtlai emaw, thiam chantir emaw a nih loh chuan inthlan pawh a chuh thei dawn lo.
Nakumah hian India hi inthlang tawh tur an ni.
Congress party hruaitu, Jairam Ramesh chuan Gujarat court thutlukna chu ‘political issue serious tak’ a nih thu sawiin, ‘kan ram mipui rorelna hma hun pawh khawih phak’ a nih thu a sawi bawk.
“He thil hi Modi-a sorkarin phuba lakna politics a khelhna lantirna chiang tak a ni a, mi tihhlauhna politics, mi tihthaihna politics leh mi tihduhdahna politics a ni,” tiin Ningania an party an thutkhawm zawhah a sawi.
Rorel lai, BJP minister eng emaw zat chuan Gandhi-a leh an party-in court thutlukna siam an sawisel reng chu an dem thu an sawi ve bawk.
Union Labour Minister Bhupender Yadav chuan Gandhi-a hian Other Backward Classes (OBC)-te chu ‘Modi’ tih hming hmangin a hmusit niin a sawi.
“Tute hming emaw sawihnawm hi duh sawi theihna zalenna a ni lo,” a ti.
India-a law minister thin, nikuma Congress chhuahsantu, Kapil Sibal chuan court thutlukna siam chu ‘a mak hle’ tih a sawi.
Gandhi-a thil sawi chuan ‘mi pakhat tum bik a nei’ tih sawiin Modi tih hming pu zawng zawng a sawina a ni lo tih a sawi.
A chunga hremna lek tur puan a nih hnuah hian Gandhi-a chuan Mahatma Gandhi thu sawi, “Ka sakhua chu thu dik leh tharum thawh lohnaa innghat a ni a. Thu dik hi ka Pathian a ni a, chu chu tharum thawh lohna awmzia a ni,” tih chu Twitter-ah a tar lang.