Portugal captain Cristiano Ronaldo chuan world record ni turin ram tan vawi 197-nan a inkhel a, goal hnih khung bawkin Portugal in 4-0 in Liechtenstein an hneh.
Lisbon khawpuiah Ningani zan khan Estádio José Alvalade-ah Portugal in Euro 2024 qualifying an khel tan a. An khingpuite hi khawvel football-ah buk rit tak an ni lova, Portugal an chak chiang hle.
Kum 38 mi Cristiano Ronaldo hian goal hnih a khung avangin ram tan goal 120 a khung tling tawh.
Kum 2003 khan ram tan inkhel tanin nikum World Cup khan World Cup hrang hrang panga a goal khung thei hmasa ber a lo ni tawh.
Liechtenstein lakah hain second half-ah penalty a khung a, a hnuah freekick atangin an goal hnuhnung ber a khung.
Portugal hian first half-ah inkhel thunun hneh viau mahse goal an khung hleithei lo. Minute 8-naah Joao Cancelo hmangin goal an khung a. A bak erawh khung belh lovin Ronaldo-a’n huntha a neih goal-ah a chantir thei lo.
Second half tan hnu lawkah erawh an goal hnihna an khung a, Bernardo Silva chuan goal a khung hnuah Ronaldo-a’n a goal hnih a khung a. Friendly inkhel ni lo ram leh ram inelnaah goal 100 khung tling thei hmasa ber a ni bawk.
Portugal manager Roberto Martinez hnuaia inkhel an hmachhawn hmasak berah hnehna an chang nghal a. Martinez chuan, “Training tha kan neih hnuah kan inkhel a tbha hle a, hei hi kan kal chhoh dan tur chu a ni. Hetiang inkhel hi awlsam anga lang nimahse chetsual awl tak thin a ni.” tiin a sawi.