Tipra Motha Party chief Pradyot Bikram Manikya Debbarma chuan Ningani zan khan Delhi-ah Assam Chief Minister Himanta Biswa Sarma a kawm.
An inkawm hma lawk hian an party-in an phut, Tripura ram leilung fate himna tur atan ‘ram danpui anga thil kalpui’ dan tur enpuitu tur chu sorkarin a ruat fel bawk.
Hruaitu pahnih inkawm tuk, Zirtawpniah khan Tripura Legislative Assembly-ah speaker thlan zui a ni a. Hetah hian eptu – CPM, Congress leh Tipra Motha hian BJP candidate khing turin candiate intawm an siam a; mahse, Union Home Minister Amit Shah-a nen Debbarma hi an inkawm hnuah an MLA 13 chu inthlanah hian an hai vek dawn ta a ni.
Tripura-a lal chhungkaw thlak kal zel hian Ningani khan Shah nena inkawma interlocutor ruat a nih thu hi Twitter-ah a tar lang bawk.
“Home minister nen kan inbiaknaah interlocutor ruat fel a ni tih sawi a ni a. Pu Himanta Biswa nen nizanah an inkawm zui bawk,” tiin Zirtawpni tukah khan a tar lang leh bawk.
Tipra Motha hian tun hnaia Tripura-a bial 60 inthlanah khan MLA 13 an nei phak a, an vawi khat assembly inthlan chuhna a ni a. BJP chuan bial 33 lain Left-Congress tang dunin bial 14 lain Trinamool Congress-in lak an nei lo.
State Congress chief pawh lo ni tawh, Debbarma hian lawm taka eptua thut chu an party-in an duh ber, Greater Tipraland’ nawr chhuahna a nih chuan a duh zawk tih a sawi.
Home Minister Amit Shah, Tripura Chief Minister Dr Manik Saha and BJP chief JP Nadda te chuan March 8 khan Tipra Motha hruaitute hi tribal hamthatna tur chungchangah an lo inbe tawh.
BJP leh Tipra Motha hi inthlan hma pawh khan tanho tumin an lo indawr tawh a; mahse, tribal party hian an puala state neih an phutna chu BJP-in an pawm theih loh avangin an thawkho ta lo.
BJP hian thuneihna chang turin Tipra Motha thlawpna pawh an mamawh zui ta bik chuang lo va, hetih rual hian nakuma ram inthlanpui lo awm tur thlirin party thar hi biak chhiat a rem lo.