- Rosangzela, Vh (8974138026)
Tirhkoh Paula’n “ tun a chinah hian keini zawngin tisa lamah chuan tumah kan hre tawh lovang..” a tih ang deuhin han sawrkar meuh hi chuan tisa lama min mamawh tute hi kan hre tawh mang lo chu anih hi, ruling party office ah pawh an in hre tha duh tawh mang lo. Thenkhat an mawm a thenkhat an hawi hil a; kartluana party office kai pawh kartawp lamah an hlim chuang lova, ngui takin inrinni bazarna tur sum puk tur zawngin an hawi ruk ruk mai anih hi. Chutihlaiin, kum 2018 inthlan campaign lai a thawhhlawk em em lo, vawikhat pawh campaign a che chhuak lo kha a mawm mawm an ni leh si a. Pathian leh kan ram tan ti a mahni nupui fanaute kalsana campaign a chhuak te kekawr ipte lah chu a ruak hiau si a, beidawng takin an hawi fi hmuk hmuk mai a ni. Hetiang taka party worker beidawng te hi kan lainat a ni, mahse mak deuh mai chu heti khawpa pute laka beidawng te hian Party President ah beiseina an nei tlat zuk nia. Ni, a khat mawi tawkin Party President in ban vai pahin lungngai suh u, a hunah in hmu mai ang a tih hi an ring viau lawi si.
Ram Sq ft. nuaikhat zet a zau CBI in Cheng Vaibelchhe 4.39 man vel tura an chhut chu cheng nuai 26 chauhin a lei thei a, kum 2004 – 2009 chhunga Union Railway Minister a nih lai khan mi 12 hnenah Sawrkar hna Group D pe in ramzau tak tak nen a lo thleng kual pek a, chuavangin thubuai ‘ Land for Jobs Case’ tih a lo piang a. Hetiang a chanchin ngah ve tak India ram politics a kum 45 vel zet lo tal tawh, kum 1990 – 1997 chhunga Bihar CM Laloo Prasad Yadav mipui hriat hlawh tak khan a hunlaiin Bihar sawpchhe hle mahse amah a rinna nghat mi sang tamtak an awm tho. Bihar a hnam hnuaihnung ten an tan a dikna petu a ni an ti mauh mai, hnam hnuaihnung te hmang tangkai in politics ah hamthatna a hui thiam em avangin ‘ Laloo Caste Arithmetic ‘ tih a ni. Chanchinbu mite chuan Laloo hi sual bulpui ‘ epicenter of crime ‘ an ti fiam hial a, chumai duhtawk lovin Bihar hi lunghriam hman hunlai ‘ stone age ‘ ah a hruai kir a ni tiin ngaihnawm tak takin an ziak kur ngei nguai thin. Thalai hna neilo te hna pek aiin sual ti tura kut zalenna pek an ni. Fodder Scam kan hria ran chaw man cheng vaibelchhe tamtak khawih chingpen a, sawrkar sum bawm atanga duhtawka sum sawkchhuak a ‘ Bihar ei chhetu ‘ an tih Laloo hian a hunlaiin CBI umzui hlawh viau mahse, politics tuinu malsawmna changin mitamtakin an zui dul dul tho a ni. Laloo hian India ram tan thil ropui tak tih a nei ve tho, Indian Railway sum tamtak hloh thin kha sum tamtak thawkchhuakin a chawisang a. Khawvel a zirna in ropui tak tak ten a ruahman dan hriat chakin thusawiah an sawm fo. Mahse, heng a thil tih that hian CBI umzui a thulh tir chuang lo.
Vanduaithlak takin keini hian Zo Laloo kan kawl mai lo maw ? Leilung hausakna ngah tak leh hnathawk thei mihring ( man power ) ngah em em Bihar State chu CM chhemi in a kaihhruai chhungin State hnufual takah a chhuah a ni. Pu Denga khan “kan ram pianhmang hi chu changkha ang mai a ni “a ti a ni awm e. Chutichungin, oil lipui chunga awm kan nih thute, agri leh horti lam tana sik leh sa duhthusam kan neih thute, ramhmul damdawi lam hausakna la varpawh loh kan ngah zia te, ram hmasawnna atana pawimawh ber mai ziak leh chhiar thiam kan tamzia te adt. kan sawi thin. Tualchher zawlnei te phei chuan, Zofate hi khawvel ram hausa ten min la intlawnsiak dawn te an ti deuh deuh a, chumai nilovin kan Kristianna hi kan nunpui hunah ram hausakna inphum hi pawnpui sawr ang maiin kan la sawr chhuak tlu tluk dawn a ni tih thlengin an au chhuahpui a ni. A thu ah hi chuan kan va hausa em !!. Thu hi tisaah a chan theihlohna chhan chu tu emaw hian Laloo hnung min zuipui a ni ber mai. Engpawhnise, Zo Laloo kaihhruaina hnuaia kan khawsak chhung hi chuan; Mosian Pisgah tlang atanga Ramtiam a thlir ang chauhin, dingdihlipin kan beisei ram chu kan thlir anih hi. Pu Rokunga’n “ engtiknge, sappui nun ngailo rengin” a tih te hi a thuk ta lutuk, tunah chuan kan ram hian “engtiknge Cachar vainun ngailo rengin” tih hi kan inhmehtawk vel chu anih tak hi!!