Aizawl khawpui hmun lailia awm, Assam Rifles battalio- te an hmunpui tharah an insawn dawn tih thawm awm mek karah Land Revenue & Settlement department chuan an ram luah chhunga dan lova mi mal ram neite chu an LSC cancel (tihtawp) a nih loh chhan tur sawifiah turin a hriattir.
Revenue Director K Laldingliana chuan March 24, 2023 khan Assam Rifles ram luah chhunga LSC neite hi show cause notice a pe a ni.
He lehkhaa an tar lan danin The Mizoram (Restriction on Use of Transfer Land) Act, 2002 hnuaiah sipai luah ram hi humhalh a ni a, mi malin ram a neih phal a ni lo. Chuvangin, ram neitute chu LSC an neihte chu tihtawp a nih loh chhan ni 30 ral hmaa sawifiah turin a hriattir a ni.
The Zozam Times-in sorkar document a neih atanga a lan danin Assam Rifles ram luah lai, Lammual ramah hian mi 54-in LSC an nei a, Assam Rifles Commandant Bangla ramah mi paliin, McDonald Hill-a Assam Rifles ramah mi pathumin an nei bawk a, an zinga mi pariatin LSC hi an pe kir tawh a, sipai luah ram hmun thumah mi 53-in LSC an nei mek a ni.
December 19, 2002-a sorkar thuchhuah, The Mizoram (Restriction in Use of Transferred Land) Act, 2002-in a sawi ang chuan Chite luia an silai kah zirna hmun tel lovin Assam Rifles luah chin hi hectare 57.37-a zau a ni.
Aizawla Assam Rifles ram luaha LSC pek tawhte chu thiat turin March 10, 2019-a council of ministers thutkhawm chuan thuthlukna a lo siam tawh a, helai hmuna dan lova LSC neite chungchangah hian Central YMA pawhin high court-ah PIL an lo thehlut tawh bawk.
Ram pum huap titi luah rengtu, Assam Rifles-te Zokhawsanga an insawn tur chungchangah hian tun hnaiah thuthar awmin, Zokhawsanga AR Complex thar chu April 1 hian Union Home Minister Amit Shah-a’n a hawng dawn a, hemi atan hian sorkar pawh a inbuatsaih.