Aizawl : Football hmanga inelna tur team 24 telna Mamit Constituency MLA Cup 2023 chu March Ni 25 zan Dar 7:30 khan Lengpui Community Hall-ah Kick off-na neih a ni.
He programme-ah hian Bialtu MLA leh Road & Infrastructure Development Board Vice Chairman ni bawk Er. H Lalzirliana chuan khuallian niin hun a hmanpui a, Mizo Professional Footballer hmasa te zinga mi Pu S. Malsawmtluanga chu khualzahawm a ni.
Khuallian chuan fuihna thusawiin Ze nghet tak leh mi puitling zia neih a pawimawh a, mihring nunkawngah hian hlawhtling turin teirei peihna leh a tawp thlenga beihzui angai a, eng line pawh nise a tawp thlenga bei thinte chauhin hlawhtlinna an chang thin a ni a ti.Tin, Sports ah mizoram in hma a sawn a, infiammi te tan kan la hmuh ngailoh infiamna hmun tha tak tak sorkar-in a din thar nasa hle a, chungte chu chhawr tangkai turin thalaite a chah a ni.
Er. Zira chuan tum mumal tak nei chunga a kal zel turin thalaite chu a chah a, mahni in hrechianga tak chunga hmalam pan zel turin thalaite chu a fuih a ni. Covid19 boruak hrehawm tak karah Mizoram Sorkar chuan infiam mite tan theihtawp a chhuah a, a hlawhtlinna kan hmu mek zel a ni a ti bawk.
Khualzahawm S. Malsawmtluanga chuan Professional footballer ni tura a zinkawng harsa tam takte thalaite chu a hrilh a, kan seilenna chu eng ang chhungkua pawh nise kan nih tumah kan chian a, kan thawhrim phawt chuan eng thil mahin min dang theilo a, hlawhtlinna chu mi thawkrim apiangte chan tur a ni a ti bawk.
Mamit Constituency MLA Cup 2023 kick off program hi Pu Franco Malsawmzuala, Organising Chairman chuan kaihruaiin, Tv. Joel Lalramdinmawia Organising Secretary chuan technical report a pe a, Pu VLR Thlamuanpuia Treasurer GSA Lengpui chuan lawmthu sawina hun neiin hun a khar a ni.