German forward Niclas Fullkrug chuan Peru lakah goal hnih a khung a. Friendly inkhelah team thar din tum Germany in 2-0 in hnehna an chang.
Inrinni zanah Mainz khawpui a Mewa Arena-ah Germany hian an South American mikhualte hi an hmachhawn a. Nakkum a Euro an thlen tur thlirlawkin team inbuatsaihna an kalpui tan.
Nikum World Cup-ah first round a an mualpho hnuah a vawikhatna atan inkhel an hmachhawn a. Nidang ang lo takin striker pahnih hmangin tlarhmaah Fullkrug leh Timo Werner ten bul an tan a. An goal nawr a hlauhawm.
Chutihrualin tunhnaia an buaina ni fo thin a la fel lova, tlarhnungah nghet lo la awm thin a bikin Peru in taima taka ball an chuh peih thin avangin Germany in ball hloh an ngah.
Kum 30 mi Fullkrug hian minute 12-naah Kai havertz-a ball siamsak chu an goal hmahruai ni turin a khung a. Peru goalkeeper Pedro Gallese chuan Florian Wirtz leh Werner te goal khung tur a zawna tha taka a dan hnuah Werder Bremen forward Fullkrug bawkin ram tana a goal nga na minute 33-naah a khung.
Germany coach Hansi Flick chuan, “Kan team hian football rang kan khel thei tih a lang a, a bikin kan goal nawr a hlauhawm. Vawiin kan kheltha, mahse za a za erawh kan la ni lo chiang.” tiin a sawi.
Inkhel dangah Morocco in an ram chanchin a vawikhatna atan vawi nga world champion ni tawh Brazil chu 2-1 in an hneh.
Tangier a inkhelah World Cup semifinalist Morocco hi friendly inkhelah an team tha an rem a. Inkhel boruak pawh a sang.
Sofiane Boufal chuan minute 29-naah mualneitu tan goal khung hmasa in hei hi second half-ah Brazil captain thar Casemiro chuan a sut a. Minute 79-naah Abdelhamid Sabiri chuan Morocco chakna goal a khung.