Israeli sipaiten Inrinni zan atanga West Bank-a an ram luah china chet an laknaah Pathianni khan Jerusalem leh Jenin chhehvelah Palestinian pali vel an that.
Palestinian health ministry thupuangtu, Mohammad Hleil chuan Al Jazeera hnenah Jerusalem hmarthlang lam, Biddu khuaa Palestinian pathum chu thah an nih thu leh heng mite hi Ahmad Zahran, Mahmoud Hmaidan leh Zakariya Badwan an nih thu a sawi.
Israeli sipaite hian Jenin khawpui chhimthlang lama Burqin khuaa mi, kum 22 mi, Osama Soboh chu an that bawk niin Hleil chuan a sawi.
Hleil-a hian Palestinian dang pawh an that nia an hriat thu a sawi a; mahse, an la finfiah thei lo niin a sawi bawk.
Israeli chanchinbute chuan Palestianian ralthuam kengte nena an intihbuainaah hian Israeli sipai pahnih na takin an inhliam a, damdawi inah dah an nih thu an tar lang ve bawk.
Hleil chuan Al Jazeera hnenah hian Biddu khuaa mi Palestinian pathumte chu Israeli sipaiten an kawp niin a sawi a. Soboh-a erawh chu Jenin-a Ibn Sina damdawi inah a thi niin a sawi thung.
Palestinian news agency Wafa chuan Soboh-a hi Israeli sipaiten Burqin luhchilha in pakhat an hualnaa inkahna thlengah a thi niin thuneitute sawi a tar lang.
Zahran, Hmeidan leh Badwan te ve thung hi Israeli sipaiten Biddu bul, Beit Anan an luhchilha ralthuam keng dangte nen an intawhchilhnaah an that niin a tar lang ve bawk.
Israeli chanchinbute chuan sipaite hian ‘Hamas mite an dap’ niin an tar lang.
Zahran-a chhungte chuan Israeli sipaite hian chawlhkar eng emaw zat an enthla tawh a, a hma pawhin an in an dap tawh a, an chhungte dang pawh manin an dawp niin an sawi tih tual chhung chanchinbute chuan an sawi.
Zahran-a nu chuan Palestinian Authority-in a fapa man a nih theih nan an pui nia a ngaih thu a sawi a, a hma lawkin PA sipaite hian an in an lo dap tawh niin a sawi a. “PA hian Israeli-te hi an lo kaltir a ni,” a ti.