Mizoram chhuahsana Tripura-a inbengbel ta Tuikuk vote nei mi 4,318 chu Mizoram Electoral Roll atangin paih an ni tawh a, kumin kumtawp lama Mizoram assembly inthlan hma ngeia paih vek chu Mizoram election department duh dan a ni.
Mizoram election department atanga thudawn danin Tripura-a inbengbel tawh Tukikuk vote nei hming 4,318 a paih tawh a, hming la paih loh mi 6,084 an la awm mek a ni.
Election department hotuten an sawi danin Tripura assembly inthlanpui vuakvetah Tripura State Election Commission hian Bru mi electoral roll-a hming an thun tharte Mizoramin a lo paihna tur ngenna hi hun reife an titawp a. Tunah hian an rawn thawn tan leh mek a a ni.
ERONet hmanga Tripura a Bru-te electoral roll-a thun tawh, Mizoramin a lo paih ve tura an thawn hi a vuaicha hle a. Hetiang hi a nih avangin Mizoram Election department hotute leh Mamit, Kolasib leh Lunglei district election hotute chu tun kar chho hian Tripura State Election Commission thuneitute hmu tura Agartala kal turin an inruahman a, hmun leh hmunah thil sawi fel a awlsam zawk an rin thu an sawi.
Mizoram election department hotute chuan kumin kum tawp lama Mizoram assembly inthlan hma ngeia Mizoram electoral roll-a Bru hming la chuangte paih fai vek chu an duh dan a nih thu an sawi a. Election department-in an rin dan leh Tripura State Election Commission hruaituten an sawi dan chuan Tripura-a inbengbel tawh Bru vote neite hi Tripura electoral roll-a thun kim vek an nih em loh pawhin la thun loh tlem te chauh an awm tawh a. Chuti chung chuan ERONet hmanga electoral roll-a Bru an thunte thawn hi technical thila harsatna avangin a chak thei lo niin an hria a ni.