India-a eptute hmatheh lian ber, Rahul Gandhi chuan parliament member a nihna atanga bân a nih chhan chu Prime Minister Narendra Modi-a thurualpui sumdawng chhui tura a phutna a aupui vang a nih thu a sawi a, mipui rorelna tan a au zel dawn tih a sawi bawk.
Kum 52 mi, Gandhi-a hi Zirtawpni khan parliament member a nihna atanga chawlhtir a ni a, a hma ni chiahin Modi chawr chhuahna, Gujarat-a court chuan kum 2019-a inthlan campaign laia thu a sawiah Modi tih hmingpu a tihmingchhia tiin kum hnih lung in tang turin a hrem a ni.
Modi-a sorkar hi eptu politician leh mihring dikna chanvo humhalhtu hrang hrangte chuan dan tlawhchhan siin anmahni sawiseltu leh eptute an ngawih theih nan a che nasa niin an puh thin a; mahse, Gandhi-a chuan hetianga an tihthaihna avang hian a ngawi mai mai dawn chuang lo tih a sawi.
“He rama mipui rorelna kalhmang vawn him a nih theih nana ka tih duh chu ka ti zel dawn tho a ni,” tiin Inrinnia thuthar lakhawmtute a kawmnaah a sawi a. “Mi tihhlauh tumin mi tam tak hmanruaah an hmang a, kei chuan ka hlau ve lo,” a ti.
Modi-a eptu lian bera ngaih, Gandhi-a MP a nihna atanga paih a ni hi India-a industrialist thiltithei ber pakhat, Gautam Adani-a leh prime minister inkungkaih danin rinhlelh a hlawh mek laia tih a ni.
Modi-a hi Adani nen hian kum tam tak lo inhnimhnai tawh an ni a, tun hnaiah US investment firm pakhat chuan a sumdawnna lalramah hian tih dan fel tawk lova thiltih a awm niin an sawi a, hei hian sawi a hlawhin eptute pawhin Modi-a inhnamhnawih dan chhui an phut phah nasa hle a ni.
Gandhi-a telna Congress party pawhin mumal deuh zawkin he thil hi chhui an phut thu parliament-ah vawi tam an lo aupui tawh a ni.
“Chawlhtir ka nih chhan ber chu prime minister hian Adani chungchanga ka thil sawi leh tur a hlauh vang a ni,” tiin Gandhi chuan a sawi a. “Zawhna erawh ka zawt zui zel dawn – prime minister leh Pu Adani-a engtiang chiahin nge an inkungkaih?” a ti.