AZL: Mizoram Pradesh Congress Committee (MPCC) President Lalsawta chuan sorkarna an chang a nih chuan Lunglei khawpuiin Municipal Council a neih dawn avanga ni 100 inhlawhna aiah Urban Employment Guarantee Scheme an kalpui dawn tih a sawi.
Inrinni Congress party-in LMC inthlan tur pualin Luangmual (LMC Ward No. 10) leh Lunglawn (LMC Ward No.11)-ah ‘Lunglei Dinthar Lehna Vantlang Inkhawm’ a buatsaihah thu sawiin Lalsawta hian, “LMC inthlan dawn vangin Lungleia chhungkaw tam tak chu ni 100 inhlawhna a bo tawh dawn avangin an lungngai; mahse, lungngai lo turin kan duh. Congress party-in sorkarna kan chang a nih chuan chhungkaw khawsak harsate chhawmdawlna tur Urban Employment Guarantee Scheme kan kalpui dawn a ni,” a ti.
Lalsawta hian Lalduhoma kha a MLA nihna an paihsak khan a MLA-puiten an hotupa thlavang hauh ngam loin a mi malin an tawrhtir a, kha’ng MLA-te kha huaisen ngam se sorkar a sawinghing dawn nia a hriat thu a sawi a. Chutiangin MNF MLA-te anmahni thlangtu mipuite thihna kotlanga an din laia Congress MLA, Zodintluanga Ralte, Thorang bialtuin RT-PCR a pek pawh an dawng ngam lo a, thihna leh natna an mipuiten an tawh laia hauisen ngam lo Lunglei MLA-te a dem thu a sawi.
Mizoram hmun tam takah That Loh Theih Lohna Bawm an din thei tih sawiin, he bawm hmangin Congress party-in Mizoram hi sorkar tha, mi taima leh mi thawkrimte dinchhuahna ni turin an siam dawn niin a sawi a, “LMC inthlanah MNF an tang em em a, an tan zia lantirtu chu an president leh chief minister ni mek pawh Lungleiah kal lovin Aizawlah an khung bet thei a ni,” Lalsawta’n a ti bawk.
Lunglei Dinthar Lehna Vantlang inkhawm an buatsaihah hian Congress MLA Lalrindika Ralte leh MAHILA President Vanlalawmpuii Chawngthu te pawhin thu an sawi.