Premier League-ah pawh lo khel tawh, Newcastle United leh Stoke City striker hlui Joselu chuan ram tana a inkhelh hmasak berah minute hnih chhungin goal hnih a khung a. Spain in hnehna changin Euro 2024 qualifying bul an tan.
Inrinni zana Malaga a La Rosaleda Stadium a inkhelah hian Dani Olmo chuan goal hmahruai a khung a. Minute 13-naah Alejandro Balde ball pawhlet chu goal-ah a khung.
Kum 32 mi Joselu hi huntawp dawn lamah dahluh niin minute 83-naah Fabian Ruiz ball cross a tauh lut a, minute hnih pawh la liam hma in penalty area chhunga remchang a neih chu goal-ah a khung leh bawk.
Kum 1998 a Fernando Morientes hnua Spain tana a vawikhat inlanna a goal hnih khung leh thei hmasa ber a ni a. Luis de la Fuente pawlte hi European qualifier-ah an muala an inkhel hnuhnung 23-ah an la chak vek.
Spain tana goal hnih khung Joselu hian season hnih chhung Newcastle United-ah hun hmangin hetih chhung hian goal sarih chauh a khung.
Nimahsela an rama a kir leh hnuah player tangkai niin Alaves leh Espanyol tan match 139 atangin goal 49 a khung a, tun season-ah goal 13 a khung tawh.
Captain Mbappe
France captain thar Kylian Mbappe chuan goal hnih khungin Euro 2024 qualifying-ah an ram bul a tanpui a. Netherlands 4-0 in an sawp.
Stade de France-ah World Cup final a tlawm France hian goal khung turin minute hnih lek an mamawh a. Captain a nih loh avanga lungawi lo nia sawi Antoine Griezmann chuan an goal hmahruai a khung a, Mbappe-a siamsak atangin goal a lut.
Minute ruk hnuah defender Dayot Upamecano chuan an goal hnihna a khung leh bawk.
Minute 21-naah Mbappe-a’n ram tana a goal 37-na a khung leh a, huntawp hma in second half-ah an goal hnuhnung ber a khung.
Dutch coach Ronald Koeman-a’n an squad-ah hri a len avangin player panga chhawr theih loh a nei a, defender pahnih Matthijs de Ligt leh Sven Botman, forward Cody Gakpo, midfielder Joey Veerman leh goalkeeper Bart Verbruggen te an awm loh avangin Dutch team hmelhmang a danglam.
Belgium tan Lukaku
Club lamah a beisei angin season a hmang lo mek a, tunhma pawhin sawisel a lo tawk zeuh zeuh thin. Mahse an ram tan erawh striker hlauhawm a ni fo reng zel.
Romelu Lukaku chuan a ze ngai chhuah lehin Sweden lakah hattrick a siam a, 3-0 in Belgium in hnehna an chang.
Swedish legend Zlatan Ibrahimovic-a’n ram tana a inkhelh leh zanah Lukaku zawk a langsar a. First half-ah goal a khung hnuah second half tir leh tawp lamah goal a khung leh.
Kum 41 mi ni tawh Ibrahimovic hi minute 73-naah khelmual luhtir a ni a, kum 41 leh thla nga leh ni 21 a upa niin European Championship qualifier khel thei upa ber dawttu a ni a. Kum khat dawn a awl hnuah ram tan a inkhel leh a ni.