Election Commission of India hruaitute chu an zavaiin Assam-a bial then thar tum mek a hmuna ena political party leh mipui pawl hrang hrangte kawm turin an thang mek.
Assam-a parliament leh assembly bial then thar tumna hi kum 14 liam tawh atanga sawi rik a ni tawh a. Bial siam thar hnuhnung ber chu kum 1976 daih tawh kha a ni.
EC team hian Thawhtanni khan mi hrang hrang an kawm kual a. Assembly leh parliament bial then hi Delimitation Commission-in an tih thin a ni a, Assam-ah hian EC-in hma an la ta thung.
Chief Election Commissioner Rajiv Kumar leh commissioner pahnih, Anup Chandra Pandey leh Arun Goel te hi Thawhlehni thleng Assam-ah hian an châm ang.
EC hian December khan Assam-a bial then thar tum a nih thu leh kum 2001 chhiarpui behchhana than thar a nih dawn thu a lo puang tawh.
Delimitation Act, 1972-in a sawi angin Assam-ah hian bial hi Delimitation Commission-in kum 1976-a 1971 chhiarpui behchhana a then kha a hnuhnung ber a ni.
March, 2020 khan sorkar laipui chuan Assam, Arunachal Pradesh, Manipur, Nagaland leh Jammu & Kashmir-a bial then thar dan tur khawihtu tur commission a lo din tawh a. Assam bik hi kum 2008 atang khan sawi rik chauh a ni thung.
Kum 2005 atang khan hma lak tan niin Delimitation Commission pawh vawi 14 lai an thukhawm tawh a. Kum 2007 khan then dan tur rawtna pawh siam a ni a; mahse, National Register of Citizens (NRC) kalpui a nih hnuah nasa taka duh lohna a awm a. Kum 2020-a sorkar laipuiin Representation of People Act a siam that leh hnuah bial then hi EC kutah a awm zui leh ta bawk a ni.
Assam-ah hian vote nei zinga 35% chuang zet Muslim an ni a. Assembly bial 126 awmah Muslim an tam zawkna hi bial 30 a ni a. Lok Sabha bial 14 awma bial rukah pawh an tam hle bawk.