England in Euro 2024 qualifying-ah hnehna chang nawn lehin a zawna vawi hnih chakin bul an tan a. Ukraine lakah 2-0 in hnehna an chang.
Gareth Southgate-a pawlte hian kar hmasa a Italy lakah away inkhel a kum 1961 hnua a vawikhatna atana an chak hnuah hmalam pan a, result tha neih chhoh zel tumin ke an pen a. Wembley Stadium a inkhelah hian an mikhualte lakah an tih tur angte tha taka hlenchhuakin harsatna an nei lem lo.
Three Lions hian an mualah felfai taka ball inpe kual a, inkhel han thunun mai an thei bik lo. Nimahsela minute 37-naah an ram chanchin a goal khung hnem ber Harry Kane-a’n a goal 55-na a khung hnuah an zia sawt a. Inrintawkna neiin an inkhel thei.
Goal hmasa an khung hnuah goal hnihna a lo kal leh thuai. Kane-a goal siamsaktu Bukayo Saka chuan dinglam sir atang ball la remin chiang tak maiin Ukraine goal-ah a khung a. Anatoliy Trubin tan ban phak ngaihna a awm lo.
Lions in bul tan tha
Euro hnuhnung bera final a tlawm England hian nikum World Cup-ah beiseina an nei sang a, mahse quarter-final bak an thleng thei lo.
Nakkum a Euro khel tur erawhin an bul tan danah an lungawi ang.
England manager Southgate-a’n a player ko thenkhat chhawr thei lo mahse tunhnaia club tana che tha te Three Lions kawr ha a enchhin theihna hun a nei.
Italy lakah second half-ah tlahniam hle a, Ukraine laka a tir minute 30 chhung an khelhdan thlir erawhin hmasawn la ngai an ni tih a lang a, nimahsela tun dinhmunah an tan point ruk hmuh hi thil tha a ni.
Winger Saka a tal hnawk hle a. England tana a bul tan hmasak berah James Maddison pawhin team tan hmun pawimawh a chang thei tih a lang a. Brentford striker Ivan Toney chu ram tan a vawikhatna atan khelh tir niin England in an rinrawl Kane-a hmunruak awh zo tur striker an nei tawh dawn niin a lang.
Southgate chuan an inkhel zawhah thlirletin, “Kan inkhelhdan a lungawithlak hle in ka hria. Halftime lai khan player te a aia tha zawka khel turin kan infuih nasa. Italy lakah ball kan kawl nghet tawk lova, zaninah erawh tihsual nei tam tawh lo turin dawhtheihna kan lantir.” tiin a sawi.
Champion lai chak ve ta
Italy in an match hmasa berah England an hneh lo. Nimahsela Euro 2024 qualification Group C-ah an point hmasa ber hmu in 2-0 in Malta an hneh.
Ta’ Qali National Stadium a inkhelah Italy tan forward Mateo Retegui chuan match hnih atanga a goal hnihna a khung a. Kum 23 mi hi Argentina a piang nimahsela a pi leh pu te kaltlangin Italy tana inkhel thei a ni a. Italian tawng pawh hmang lo, Italy a la inkhel ngai lo a ni chungin Azzurri in an ko a, rama tana a inkhelh hmasak pahnihah goal a khung ve ve.
Midfielder Matteo Pessina chuan an goal hnihna a khung ve leh bawk.
Italy coach Roberto Mancini chuan, “Hetiang inkhel hi tlawm chuan dinhmun ti harsa vek thei a ni a, chuvangin hnehna chan a pawimawh a, chetsual a awl hle bawk.”
“Goal kan khung hma a, kha aia tam khung thei kan ni a, mahse sawi tawh angin a awlsam ngai lo.” a ti.
Inkhel dangah Denmark tan striker ngaihven hlawh Rasmus Hojlund chuan match hnih chhungin goal nga khung mahse Kazakhstan in huntawp dawnah goal hnih an khung avangin 3-2 in Denmark an tlawm.