Aizawl : Congress Legislature Party (CLP) Leader Zodintluanga Ralte chuan Lunglei khawpuiin MNF sorkar thlak an duhzia a lang chiang tawh a, he sorkar hi thiah a nih dawn chuan mipuiin fimkhur tak leh ngaihtuahna fim an put a ngaih thu a sawi.
Nimina press statement a siamah Zodintluanga Ralte hian, LMC inthlan boruakah chawlhkar khat dawn lai Lungleiah a cham chhungin mi mal in, dawr leh bazar-ah te mi hrang hranga a len kualna atang leh mi titi atangtein MNF sorkar paih hrim hrim hi mipuiin an duh tih a chiang thu a sawi a. “MNF mi leh sa pawh tam tak ka kawm a, Pu Zoramthanga’n kan ram a hruai dan leh Robert Romawia nena kan ram an suasam dan an hmuh hian Lunglei Municipal Council leh MLA inthlanpuiah te MNF vote an tum tawh loh thu an sawi nasa hle a ni,” a ti.
Zodintluanga Ralte hian hun kal tawha Lunglei mipuite vote thlak dan thlira thil chiang em em chu party dangte nena inpawlh nasat tak avanga kum 2013-a Congress candidate te vote hmuh aia tlem fe hmu chungin an tling thei a, hetiang dinhmunah hian an ding leh thei tih a sawi a. Party dang (ZPM) an vote vak hian tling zo tak tak chuang si loin mipuiin an nin em em MNF Party bawk hi an chak leh theih avangin, Lunglei Khawpui enkawl hna chu tuna chief minister Zoramthanga bawkin a thawk leh dawn niin a sawi.
MPCC Treasurer hian MLA inthlanpuiah khan ZPM in vote hmu ve nual mah se, MLA inthlan neih hnua VC inthlan hmasa, kum 2020 khan Lunglei khawpui veng 24, VC member 139 awmnaah ZPM ticket-a VC thlan tlin chu mi 14 chauh an nih avang hian LMC inthlanah ZPM hian sorkarna chance an nei lo tihna a ni. Chuvangin, Zoramthanga kaihhruai MNF party paih nan chuan mi leh sa nei tam, Congress party an hman a ngaih thu a sawi.
ZPM Leader Lalduhoma’n, “Sorkar hnathawk te chuan an lo eiru a ni thei a, a ziaawm ka ti, an ni chuan ram tan an ti hleinem, anmahni tan alawm lehkha an zir, officer nih an tum a, mahni hmasial a rawn kal chho kha an nia,” tia a sawi chungchangah sorkar hnathawkte hi eiru tur leh ram hmangaih lovah a chhuah nia sawiin, “A hminga minister ka nih ve lai khan sorkar hnathawk ram hmangaih em em, eiru ngai lo, sorkar hnathawh hi ram rawngbawl naa ngai tam tak ka hria,” tia sawiin Zodintluanga Ralte chuan, Lalduhoma ngei pawh hi sorkar hnathawk thin a ni a, sorkar hna a thawh lai khan lo eiru ve ni ta se, a inthiam viau dawn tih a chiang hle niin a sawi.