Naktuka Lunglei Municipal Council inthlan neih tur atana campaign theih hun chu nimin tlai dar 4 khan a tawp.
State Election commission chuan campaign hun tawp hnua party tinte hriat tur thupek a lo tichhuak tawh a. Lungleia vote nei lo, party thil leh campaign-a Lungleia awmte chuan nimin tlai dar 4 hma khan LMC huam chhung an chhuahsan tawh tur a ni.
LMC inthlanna neih tura inbuatsaihna kal zelah nimin khan polling party-te duty-na hmun tur pawh leh a ni a, polling station 44-a duty tur polling party 44-te leh reserve-a dah tur polling party 11-te thlan fel an ni.
Duty turte hi pawh fuh hmangin political party aiawhten an pawt a, vawiinah official-te chu an duty-na hmun tur hriattir an ni ang a, polling station an pan nghal tawh ang.
Inthlanna neih turah hian vote nei 40,548 an awm a, heng mite hian candidate 42 zing atangin an aiawha khawpui enkawltu tur an thlang dawn a, chungte chu Congress, MNF leh ZPM atangin candidate 11 theuh leh BJP candidate pakua an ni.
Tar lan tawh thin angin March 29, Nilaini zing dar 7 atanga tlai dar 4 thleng vote thlak hun hawn a ni dawn a, vote tlate chu April 3, 2023-ah chhiar a ni ang.