Aizawl: MNF party chuan naktuka Lunglei Municipal Council neih tur atana campaign kharna chu nimin khan Mizo Hnam Run, Lunglei-ah an nei a. MNF Adviser Lalruatkima chuan thu sawiin, “Lunglei mipuite rilru kan lo hliam tawh zawng zawngah thupha kan chawi a ni,” a ti.
Lalruatkima chuan, “Kan theih ang angin Lunglei mipui tan hma kan la ve thin nia kan inhre chungin, kawng hrang hrangin Lunglei mipuite duhkhawp kan ni lo tih kan hria a. Lunglei mipuite rilru kan lo hliam tawhna zawng zawngah Pathian hmingin thinlung takin thupha kan chawi,” tia ngaihdam dilin, Lunglei mipui rilru an hliam tawhna te theihnghilhsak se a duh thu a sawi.
Changkang zawk leh hmasawn zawka Lunglei dinpui turin Lunglei mipuite sawmin Lalruatkima hian, “Leitlangpuiin khawvel zau zawk el pha tura rahbi thar a chhuankaina tur, Lunglei Municipal Council inthlanah hian MNF vote vek turin kan sawm che u a. Mizorama sorkar mek, LMC dintu, MNF party chhinchhiahna arsi-ah lo vote vek turin thinlung takin kan sawm che u a ni,” a ti bawk.
MNF adviser hian he hunah an party-ah mi thar eng emaw zat a lawm lut a ni.