Aizawl : Tunhnaia Chief Minister Zoramthanga’n Champhai a tlawha hma- lakna tur hrang hrang te bawhzuiin nimin khan Champhai South bialtu MLA, Minister of State ni bawk TJ. Lalnuntluanga leh Champhai North bialtu MLA Dr. ZR Thiamsanga ten hmasawnna hnathawh tur te tlawhin, an enfiah.
Chief Minister hian Champhaia khawtlang hruaitute hnenah Cha-mphai khawpui leh a chhehvela hmalak theihna tur hrang hrangte a sawi a. Hemi bawh- zuia hmalakna theihna tur enfiah zingah parking siam theih dan tur te, Chhangphut field-a zan lama inkhelh theihna tur flood light Rs. vaibelchhe 1.5 senga siam theih dan tur te, Zotlang leh Tlangsam inkar kawng double lane black-topping, Rs. vaibelchhe 4 senga siam theih dan tur te a tel a. Project estimate siam dan tur leh a tuldangte bawhzuiin, MLA pahnihte hian official-te hruaiin a hmunah hmalak dan tur an enho niin sorkar thuchhuah chuan a tarlang.
T.J. Lalnuntluanga chuan a bial chhung Ruantlang Lersia field chhak lei tlahniam thin, DM&R department kaltlanga siamthat dan turte, Mualvenga lei tlahniam dawl that dan tur te leh Sub-Hqrs. YMA Champhai conference neihna hmun tur Ruantlang Vanhnuailiana hall-a pandal sak belh mek te a tlawh a. Kanghlai tlang (Mualnuam) panna kawng leh tlang hmunhmate PMJVK scheme kaltlanga cheithat a nih theih nana project liantham deuh siam dan tur te official-te nen an enho bawk.
MLA pahnihte hian an bial chhunga special assistance to state for capital investment (SASCI) hnuaia hmasawnna hnathawh mekte pawh an tlawh a. Heng zingah hian Champhai Vengthar leh Zote kai inkar kawngpui black-topping thawh tan tur leh Vengthar field laih zawh takte, Chhangphut field chung kawngpui, motor parking atana laih zau mekte pawh a tel.