Aizawl : MPCC President Lalsawta chuan nimin khan Lunglei Press Club-ah thuthar thehdarhtute a kawm a, ram tana tih tur a hriat avangin zui tlak a nih thu a sawi a. Lunglei hian bial mipuite thlavang hauh ngam MLA a mamawh tih sawiin, MNF-in Lunglei mipui rethei zawkte inhlawhna tur budget-a dah vek tawh anga an sawi chu thudik lo niin a sawi bawk.
Lalsawta hian Pathian leh mipui puihnain an sorkar leh ngei a ring tih sawiin, “Ka kal tumna hi ka hria a, Mizoram mipui hruai ka tumna pawh ka hre bawk. Ka kal tumnaa kal tura tawn tlang ngai te chu Pathian leh Political Will hmangin ka sutlang bawk ang. Zui tlak ka ni, a chhan chu ram tana tih tur ka hriat vang a ni,” a ti.
Ram chhiatna leh dam lohna thiam taka sawi thinte hi thusawi thiam tihte an ni ta mai nia sawiin, “A damdawi an sawi ngai si lo a. Kan ram damdawi chu sorkar tha hi a ni. Pathianin mipui tha leh ram tha min pe a, midang beidawnna thlentu ni lova beiseina leh rinna petu nih hi Pathian min din dan a ni,” a ti bawk.
Lunglei hian bial mipuite thlavang hauh ngam MLA an mamawh thu sawiin MPCC President hian, “Tuna ruling MLA te hi kan CM hian a seh dawn lo, mahse an hlau em em a, an hlauh chhan ka hre lo. Anmahni thlangtu mipui aia Chief Minister an hlau hi MLA tha leh huaisen an nih loh zia tichiangtu a ni,” tia sawiin, thihna kotlanga chhim bial mipuite an awm a, RT-PCR an mamawhna pawh au pui ngam lo, bial mipuite leh Lunglei mipuite thlavang pawh hauh ngam lo khawpa an awm chu mak a tih thu a sawi.
Lalsawta chuan, Urban Employment Guarantee Scheme hi siam an tum thu a sawi a. MNF-in Lunglei mipui rethei zawkte inhlawhna tur budget-ah an dah vek tawh an tih hi thu dik lo a nih thu sawiin, “2023-2024 Budget Demand for Grants kha ngun takin en ula, hetiang pawisa hi dah a ni lo reng reng a ni,” tiin, Lunglei chungchang mai bakah Aizawl atanga Assam Rifle insawnchhuah tur chungchangah pawh ram hruaitute’n dawt an sawi reng chu thil tul lo tak niin a sawi.
LMC inthlan vuakveta sum leh work order hmanga lei tur zawnga mi thenkhat an vak huai huai mai hi pawi a tih thu sawiin Congress President hian, “Hetianga lei theiha mipui min ngai tlat hi a vanduaithlak ka ti bawk. Kan ram a chhiat zel chuan tute pawhin kan tuar. Hawh u, sal leh nawhchizuar ang maia lei theihin i awm lo ang u. Baala hma a thingthi ngai lo, lei theih loh mi tam tak kan awm. Lei theih lohin i awm zel ang u,” a ti bawk.
Congress President hi Hachhek bialtu MLA Lalrindika Ralte, Vanlalawmpuii Chawngthu, Mahila President, K.L Chhawnzauva, LDCC President leh R.B. Lalmalsawma, NSUI President te’n an tawiawm a ni.