Portugal in goal khung harsatna nei miah lova Euro 2024 qualifying bul an tan chu an chhunzawm a, 6-0 in world rankings a 92-na Luxembourg an hneh.
Pathianni zanah Stade de Luxembourg-ah Portugal tan Cristiano Ronaldo chuan goal hnih a khung a. Ram tana mipa football a goal khung hnem record a siam chu chhunzawmin vawi 198 inkhelhah goal 122 a khung tawh.
Kum 38 mi hian Ningani zan khan Liechtenstein lakah goal hnih a lo khung tawh bawk.
Coach thar Roberto Martinez chuan Ronaldo chu bul tantu zingah telh lehin goal khung turin minute 9 chauh a mamawh a. Nuno Mendes ball tauh per atang goal a khung.
Joao Felix chuan minute 15-naah goal khungin Bernardo Silva chuan an goal thumna a khung ve leh nghal.
Minute 31-naah Bruno Fernandes chuan Ronaldo goal hnihna tur a siamsak lehnghal a. Luxembourg defence pet khumin ball tha a pe lut.
Second half-ah Luxembourg in uluk zawkin goal veng mahse an tluan thei lova. Otavio chuan minute 77-naah an goal nga na khungin Ruben Neves chuan crossbar a pet per hnu lawkah AC Milan forward Rafael Leao chuan penalty a hmu a, Luxembourg keeper Anthony Moris chuan dansak mahse huntawp hma in Leao hian goal a khung ta tho.
Portugal hian hnehna vawi hnih changin Group J-ah bul an tan a, Martinez-a hnuaiah match hnih goal an venghim nghal.