Germany-in Ukraine hnena Leopard 2 tank a thawn tur zinga a hlawm hmasa ber chu a thawn ta tih German defence ministry-in a puang.
Indonaa hman chi tank lian hi Ukrainian-ten a enkawl leh hman dan an zir zawh hnuah 18 thawn zui an ni.
Defence Minister Boris Pistorius chuan tank an thawnte hi indona kal meka ral hmatawnga ‘thil thleng tidanglam theitu’ a nih tur thu a sawi.
UK atangin Challenger 2 tank pawhin Ukraine a thleng tawh bawk niin Ukraine atanga thu dawnin a sawi bawk.
Ukraine hian thla eng emaw zat chhung chu Russia-in an ram a rûn mekah lirthei tun lai zawk leh ralthuam tha zawk an mamawh tak zet thu a lo sawi tawh thin.
Ukrainian sorkar chuan Leopard 2 an dawn leh dawn loh an la sawi lo va; mahse, UK siam Challenger 2 tank erawh an dawn tawh thu an sawi.
Leopard 2 hi khawvel pumah 2,000 vel a awm a, Nato ramin a siam chhuah main battle tank-ah chuan a tha bera chhal niin Europe ram tam takin an hmang mek hlawm.
Germany hian January thla khan Ukraine hnena thawn tur hian a lo pawm tawh a, an ta leisaktu ram dangte hnenah pawh Kyiv-a thawn hi a phalsak bawk.
German danah chuan Leopard 2-te hi a leisaktuten ram danga an pe/hralh leh dawn chuan Berlin-in a pawmpui hmasak phawt a ngai a ni.
German Defence Minister Pistorius chuan an tank-te chu ‘kan thian Ukrainian-te kutah intiam ang leh a hunah tak hlan an ni’ tiin a sawi,
German sipaite chuan hlan hma hian Ukrainian tank crew-te chu Leopard 2 changkang tak, A6 variant an tih bik hman leh enkawl dan hi chawlhkar eng emaw zat an zirtir hmasa a ni.
Heng tank-te hi Russian T-90 main battle tank el pha tura duan niin a enkawl a awlsam zawk a, khawthlang ram tank dang tam tak aiin tuialhthei a hmang hek lo zawk bawk.
Leopard 2 bakah hian Germany chuan Ukraine hnenah hian specialist tank-recovery vehicle pahnih leh Marder infantry fighting vehicle 40 a thawn bawk.
Hetih lai hian UK atanga an dawn, Challenger 2 tank-te chu ‘Ukraine-a an awm tawh’ tih defence ministry thupuangtu, Iryna Zolotar chuan AFP news agency a hrilh.
Defence Minister Oleksii Reznikov pawhin a Facebook page-ah Challenger 2 bakah khawthlang ram siam sipai lirthei eng emaw zat a tar lang bawk.
UK Ministry of Defence chuan ralthuam an pek chungchang hi engmah a sawi duh lo va; mahse, a hmain Ukrainian tank crew-te chu Britain-ah tank enkawl leh hman zira chamin an haw leh tawh tih puan a lo ni tawh thung.