Netherlands in beisei an pha lo chhunzawm a. Euro 2024 qualifier-ah anni aia football lama ram buk rit lo zawk tak Gibraltar mikhualin goal hlauhawm vawi tam nei mahse goal thum chauh an khung thei a. Player 10 a inkhel zo an khingpuite hi 3-0 in an hneh.
Thawhtanni zana Stadion Feijenoord a inkhelah Dutch team in inkhel an thunun hle a, player malkhai a thlir pawhin rinlawk sa a ni.
Ball possession-ah 86% lai chang theiin goal hlauhawm hi tum 51 ngawt an siam.
Nimahsela beisei angin an khel lova, Zirtawpni zana France laka 4-0 a an mualpho hnuah hmasawn an mamawh tih a la chiang.
Minute 23-naah Memphis Depay chuan Denzel Dumfries ball cross a tauh lut a. Gibraltar goalkeeper Dayle Coleing chuan hisap sualin Dutch goal hmasa ber a lut.
First half-ah Gibraltar tlarhnungin Dutch attacker te an tibuai ve fo. Hei vang hian halftime-ah coach Ronald Koeman-a’n Cody Gakpo leh Donyell Malen te dahlutin tlarhma a siamtha a. Awmzia a nei nghal.
Minute 50-naah Nathan Ake chuan an goal hnihna tauh lutin minute 82-naah Ake bawkin an goal thumna a khung leh a ni.
Gibraltar hian minute 51-naah Liam Walker chu hlauhawm taka Mats Wieffer a tlawh avangin hnawhchhuah a ni a, tlem zawkin second half hun tam zawk an khel.
Inkhel zawh lam
Chak mahse Netherlands in hma an sawn a ngai tih an inhria. Captain Virgil van Dijk chuan, “Ball kan chanin kan fimkhur lova, inkhelh a awlsam lo. Hneh taka khelh a, goal khung nual kan inbeisei laiin goal thum kan khung a, huntha kan bawhpelh hnem hle. Hei hi kan hmalam huna kan insiamthatna tur a ni.” a ti.
Dutch coach Koeman pawhin, “Hma kan sawn a ngai, zanina kan inkhelin min barakhaih angreng zawk. Kan kheltha tawk lo, chuvangin hma kan sawn a ngai. Kan fitness pawh a that zawk a ngai. A tha tawk lo hle.” tiin a sawi.
France an chak
Republic of Ireland lakah France in hnehna an chang hram a. Second half tan tir lamah Benjamin Pavard-a’n goal mawi a khung hmangin 1-0 in hnehna an chang.
Dublin-ah France in Irish team hi hmachhawnin first half-ah goal hlauhawm an insiam hleithei lo.
Second half tan atanga minute nga chauh a kalin Pavard-a’n Josh Cullen ball pass chu a lo lak khalh a, Gavin Bazunu dan hman lohin kawh takin a pet goal.
France tan tlarhma a khelte aiin a hnung lam an langsar a. Goalkeeper Mike Maignan chuan a ram dampui bawkin Nathan Collins goal khung tur huntawp dawn lamah a dansak tha hle.
France coach Didier Deschamps chuan, “Team taima leh huaisen lakah inkhelh a awlsam tak tak ngai lo. Hma kan hruai a, mahse khatihlai pawh khan kan dinhmun a him ngai lo hrim hrim. Set piece atangin an hlauhawm reng. Keini kan nghet viau a, mahse kar hmasa kha kan tluk lo.” tiin a sawi.