Nashville, Tennessee, US-a sikula inpawngkahna thlengah naupang pathum telin mi paruk an thi tih tual chhung thuneituten an sawi.
Khawpuia fire department chuan Twitter-ah tual chhung sikul pakhata thil thlengah hian ‘hliam tuar’ pawh an tam tih an tar lang.
Nashville police chuan an buaipui mek thu leh silai kaptu hi hmeichhia kum 28 mi a nih thu an sawi tawh.
Police hian thite hi tute nge an nih hriat tumin hma an la mek.
Thuthar lakhawmtute a kawmnaah police thupuangtu, Don Aaron chuan thite hi naupang pathum, sikula thawk pathum leh silai hmet puaktu an nih thu a sawi.
Thil thleng hmachhawntu hmasa police officer pakhatin darthlalang keh avangin hliam a tuar ve bawk tih police chuan an sawi a. Officer pahnihin building chhunga silai puahna lam hi an pan a, sikula a chhawng hnihnaah silai hmet puaktu nen hian inhmachhawnin an kap hlum tih an sawi.
An kah hlumnaah hian ‘assault-type’ an tih ang chi rifle pahnih leh pistol pakhat hmuh a ni a. Amah hi a nihna chiang taka hriat theih a la ni lo.
Nashville-a WKRN News 2 reporter Peyton Kennedy-i’n social media-a thlalak a dah chhuahah chuan zirlai himte chu sikul atanga hruai chhuah an ni tih a lang.
Bureau of Alcohol, Tobacco, Firearms & Explosives (ATF) pawhin thil thleng buaipui leh chhui zuinaah an tel ve tih an puang.
Inkahna thlenna, Covenant School hi mi mal enkawl Kristian sikul niin pre-school atanga pawl ruk thleng zirna a ni a, zirlai hi kum 11 leh 12 mi vel an ni hlawm.
An website atanga a lan dan chuan zirlai 200 vel an awm a. Tual chhung chanchinbute chuan kum 2022 atang tawh khan sikulah hian ‘active shooter programme’ an lo kalpui tawh tih an tar lang.
Nashville Mayor John Cooper chuan an khawpui pumin an tuar a, khawtlangin hrehawm an ti tih a sawi.
“A tuartu chhungkuate ka tawrhpui tak zet a ni,” a ti a. “Kan khawpui pum hi in lamah kan tang a ni,” a ti bawk.